Charter Document - 06370365
| Charter Number: | 06370365 |
|---|---|
| Cartulary Title: | Chartes et documents de l'abbaye cistercienne de Preuilly |
| Charter Language: | Latin |
| Charter Origin: | Religious |
| Charter Type(s): | Testimony |
| Date: | 1235 |
| Date type: | Internal, A.D. |
| Resource Link(s): |
|
Charter:
Universis presentes litteras inspecturis frater Nicholaus de Curia Dei et frater Severinus de Fonte Johannis dicti abbates salutem in Domino Noverint universi quod in presentia nostra constituta Margareta uxor Roberti de Bellomonte armigeri concessit et laudavit ecclesie Prulliaci elemosinam quam fecit eidem ecclesie bone memorie Avelina de Acrivilla de salagio suo quod habebat apud Musterolium et concessionem quam fecit eidem ecclesie dicta Avelina de quarta parte cujusdam domus site in portu Musterolii que ad ipsam Avelinam pertinebat et venditionem duarum partium ejusdem domus quam Matheus de Varennis armiger fecit ecclesie supradicte Concessit etiam et laudavit elemosinam quam fecit eidem ecclesie pie memorie Margareta domina de Pareto de septem arpentis tam terre quam prati sitis inter Laventias et grangiam de Escho monachorum Prulliacensium et septem arpenta terre de elemosina Egidii Fabri que dicta Margareta de Pareto eidem ecclesie concessit libera et quieta ab omni consuetudine et censu Hec omnia concessit et laudavit spontanea non coacta dicta Margareta uxor Roberti de Bellomonte fratribus Pruliacensibus tenenda libere et quiete excepto quod pro quarta parte supradicte domus duodecim denarios Pruvinenses annui census solvent dicti fratres eidem Margarete uxori dicti Roberti et heredibus eorumdem Ad perpetuam autem omnium predictorum firmitatem fiduciavit in manibus nostris eadem Margareta quod in premissis omnino nec per se nec per alios aliquid de cetero reclamabit Huic autem concessioni et laudationi interfuerunt frater Nicholaus de Boilli sacrista et frater Petrus Poeta monachi Curie Dei et frater Philippus de Flaci monachus Pruliaci Actum apud Corciacum anno Domini millesimo ducentesimo tricesimo quinto mense maio