Charter Document - 06370208
| Charter Number: | 06370208 |
|---|---|
| Cartulary Title: | Chartes et documents de l'abbaye cistercienne de Preuilly |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1219 |
| Date type: | Internal, A.D. |
| Resource Link(s): |
|
Charter:
Frater Amaneus dictus abbas totusque conventus Pruliaci omnibus presentes litteras inspecturis in Domino salutem Noverint universi quod cum inter nos ex una parte et viros religiosos abbatem et conventum sancti Remigii Senonensis ex altera diutina fuisset questio ventilata super decimis quarumdam terrarum quas in parochia de Villa Nova Guiardi acquisieramus et in quibus decimam se percepisse dicebant priusquam eas acquisivimus tandem ipsi nobiscum amicabiliter componentes decimam terrarum omnium quas in dicta parochia usque ad confectionem literarum istarum possidebamus et decimam porprisie nostre de Villanova Guiardi quamdiu eas propriis sumptibus excolemus nobis quitaverunt et tenendam imperpetuum pacifice et quiete concesserunt salvis eis quatuor sextariis frumenti et duobus anone ad cumulum mensurandis vel tribus cum rasura ab eis annis singulis in festo santi Remigii in granchia nostra de Acrimonte percipiendis sicut antea percipiebant et ea conditione et tenore quod de terris omnibus quas in eadem parochia de cetero acquisierimus dictis monachis decimam sine contradictione persolvemus nisi aliter inter nos pari consensu decreverimus componendum compositiones etiam quas antecessores sui nobiscum fecerant ipsi approbarunt et ratas habuerunt Ea insuper que usque ad confectionem literarum istarum acquisieramus tam in territoriis quam in pratis ad censivam eorumdem pertinentia et inferius nominanda ipsi nobis concesserunt libere et quiete possidenda salvo in eis censu suo et jure censuali scilicet quod nisi singulis annis in festo sancti Remigii solverimus eis censum suum censivas saisibunt si voluerint donec eis censum solverimus et emendam et quod ad citationes eorum pro censiva vel pro re ad censivam pertinente nobis facta comparebimus coram eis et juri parebimus et respondebimus coram eis cuilibet conquerenti de censiva vel de re ad censivam pertinente et quando requisiti fuerimus censivam suam eis ostendemus per veritatem nostram si sciverimus Hec autem sunt que possidebamus ad censivam eorum pertinentia videlicet duas particulas pratorum quarum una sita est in Ystes et altera in Toreillum ad undecim solidos censuales duas particulas terre in Berris ad tres denarios censuales unam particulam prati ad duos denarios censuales pratum Rainardi Loet in prato novo ad duos denarios censuales pratum Odinis de Puteo in perpetuo ad decem denarios censuales pratum Alberici ad quatuor denarios censuales pratum Stephani de Bechinz ad quatuor denarios censuales apraitia sub Calvo Monte ad sexdecim denarios censuales terram retro domum Petri Billardi ad duos denarios censuales pratum Stephani de Matchesi ad sexdecim denarios censuales terram de Loparia ad duos denarios censuales pratum Galteri Costeis ad quatuor denarios censuales pratum Hugonis Panchart ad sex denarios censuales pratum Isambardi in territorio de La Reculee ad octo denarios census domum nostram de Villanova Guiardi que fuit Renaudi Boschet ad sex denarios censuales Actum anno incarnati verbi millesimo ducentesimo nonodecimo mense junio