Charter Document - 06350114

A tous ceuls qui verront et orront ces presantes lettres Nous Frere Guillaumes humbles Abbes de Reigny et tous li Couuens de ce leu de l'Ordre de Citiauls de la Diocese d'Auceurre Salut en nostre Seigneur Cum descors fut mehu entre nous d'vne part pour raison de nostre Eglise de Reigny et des appartenances d'icelle et Religieuses personnes et honestes l'Abbé et le Couuent de Mostier S Iean de l'Ordre S Benoist de la Diocese de Langres d'autre part pour raison dou Priouré de Ioux et des appartenances doudit Priouré appartenant és dis Religieus de Mostier S Iean Sachent tuit que nous de tous les descors toutes les actions querelles controuerses que l'vne partie pouuoit auoir a l'autre de tout le temps passé iusques au iour de la confection de ces presantes letres auons accordé en la forme et maniere qui s'ensuit Premierement est accordé que nous dessusdits Abbé et Couuent de Reigny hauons et haurons perpetuellement ou nom de nostre Eglise de Reigny la mitié de la basse Iustice auec tous les emolumens d'icelle laquelle estoit de ladite Eglise de Mostier S Iean et dou dit Priouré de Ioux et que li dis Religieus de Mostier S Iean hauient en la terre que l'on appelle la terre Sainct Pere auecques nous Religieus dessus dis de Reigny par non deuis demeure a nous dis Religieus de Reigny franchement et quittement a tousiours Et la haute Iustice de cedit leu demeure és dessusdits Abbé et Couuent de Mostier S Iean de laquelle Iustice lesdits hauront seuls l'execution en quatre cas C'est a sçauoir en larrecin murtre rapt et en champ de bataille desquex quatre cas li emolumens qui itra d'eus ou de l'vn d'iceus la mitié en sera baillée a nous dessus dis Religieus de Reigny sans rien metre du nostre pour la main desdits Religieus de Mostier S Iean ou pour leur commandemant [] Données l'an de grace mille trois cens dix huit ou mois de Iuillet