Charter Document - 06350112

Nos Petrus de Vico Canonicus Lingonensis Commissarius et exequutor a Reuerendo in Christo Patre ac Domino Nicolao miseratione diuina tituli S Eusebij Presbytero Cardinali Apostolice Sedis Nuncio ad partes Regni Francie pro negotio terre sancte destinato in Prouinciis Lugdunensi et Viennensi a parte Regni predicti deputatus de et super procurationibus ipsius Domini Cardinalis eidem a Sede Apostolica concessis in dictis Prouinciis perse vel per alium seu alios recipiendis in pecunia numerata Notum facimus quod nos per discretum virum Petrum dictum Petit Clericum iuratum Curie Eduensis fecimus diligenter inquiri vtrum domus seu Prioratus S Germani de Mundaum Eduensis Diocesis teneretur ad procurationem dicti Domini Cardinalis vel non et per inquestam ab ipso factam a nobis apertam et inspectam et per testes idoneos coram eo productos in loco predicto inuenimus et didicimus predictam domum seu Prioratum S Germani de Mundaum non teneri ad procurationem Archiepiscopi Episcopi Archidiaconi Archipresbyteri seu subuentiones aliquas Quare nos authori tate qua fungimur monitionem a nobis emissam in dictam domum seu Prioratum et tenentem eum pro procurationibus predicti Domini Cardinalis cum suo effectu suspendimus et pro suspensa habemus ipsum tenentem domum seu Prioratum predictum a sententiis suspensionis et excommunicationis a predicto Domino Cardinali vel a nobis latarum si quam ob defectum solutionis procurationum predicti Domini Cardinalis incurrerunt in his scriptis absoluentes et sententiam interdicti a dicta domo seu Prioratu amouentes In cuius rei testimonium sigillum nostrum presentibus litteris duximus apponendum Datum Lingonis die Lune in festo Inuentionis S Crucis anno Domini millesimo trecentesimo sexto decimo