Charter Document - 06350100

Vniuersis presentes litteras inspecturis Hugo miseratione diuina Eduensis Episcopus salutem in Domino sempiternam Nouerint vniuersi quod cum Prior de Mundaon nostre Eduensis Diocesis et predecessores sui curam Ecclesie S Germani de licentia et tolerantia predecessorum nostrorum Episcoporum Eduensium propter paupertatem et tenuitatem Ecclesie predicte et redituum ad ipsam pertinentium tenuerint vsque ad confectionem presentium litterarum et tanquam Curati rexerint in eadem Nos habito consensu Religiosi viri fratris Gaudrici Abbatis Monasterij Reomaensis Lingonensis Diocesis a quo Monasterio mouere dignoscitur Prioratus S Germani predicti considerato etiam quod Ecclesia de Suenceio adeo est pauper et tenuis in reditibus quod Rector ipsius Ecclesie inde non poterat commode sustentari Curam dicte Ecclesie S Germani et Ecclesie Parochialis de Suenceio duximus perpetuo vniendam Ita quod Rector de Suenceio qui nunc est et qui pro tempore erit Curam vtriusque Ecclesie S Germani et de Suenceio plenius obtinebit perpetuo et habebit ac oblationes legata sepulturas confessiones et nuptias seu illa que pro benedictionibus nuptialibus percipi debent et consueuerunt et quecunque ad Altare de S Germano prouenient idem Rector perpetuo leuabit et integraliter possidebit excepto vno bicheto siliginis [in quo dictus Curatus et successores sui tenebuntur dicto Priori et suis successoribus] annuatim infra natiuitatem Domini persoluendo Ita tamen quod dictus Rector qui nunc est et qui pro tempore erit in dicta Ecclesia de S Germano tenebuntur perpetuo per se vel per alium deseruire et facere luminare vel procurare erga Parochianos Ecclesie S Germani vt faciant secundum quod consuetum est fieri temporibus retroactis Et si contingat aliquam personam in dicta Ecclesia de S Germano tradi Ecclesiastice sepulture Prior dicti loci et eius socius post Missam dicti Curati diuina si voluerint celebrabunt et oblationes suas integraliter percipient et habebunt Reseruato tamen iure patronatus in predictis Ecclesiis Abbati supradicto Rector vero predictus qui nunc est et qui pro tempore erit habebit et percipiet perpetuo Mansum quod quondam fuit Benedicti Presbyteri defuncti provt dictus Presbyter possidere consueuit et tenere vel aliud Mansum ad valorem dicti Mansi Et quod dictus Curatus et sui successores qui pro tempore erunt possint excolere de terris essartis in finagio dicte ville provt homines ipsius ville excolere et essartare consueuerunt Vsagium plenarium in omnibus locis terris ripariis nemoribus et vbicunque Parochiani de sancto Germano vtuntur et vtentur in futurum quandiu in dicta villa de sancto Germano idem Rector vel eius Vicarius facient mansionem Ac etiam idem Rector solus percipiet mutonos de Romenaio totaliter et habebit Volentes insuper quod decimas dicte Parochie quas Prior dicti loci vsque ad hec tempora percepit solus integraliter percipiat tam in noualibus quam antiquis et quod idem Rector in dictis noualibusnon possit ius aliquod de cetero reclamare Nos autem hec omnia volentes laudantes ac etiam approbantes et confirmantes presentibus litteris sigillum nostrum fecimus apponi in testimonium veritatis Datum anno Domini millesimo ducentesimo octogesimo nono mense Februario