Charter Document - 06350095

Nos Ieans de Chalon Cuens d'Auceurre et Sires de Rochefort et nos Alais de Neuers Contesse d'Auceurre façons sauoir a tos ces qui verront ces presantes letres que com l'Abbés et li Conuents de Moutier seint Iean eussoint acheté de noble homme Guillaume de lonuille Seigneur de Iuley et de Dame Marie sa femme de Tanlay tout çau que il auoint en la ville et ou finage de Ious en Auceurrois por lo preis de quatre cens liures de tournois et nos deuandis Iehans eussiens ladite terre recosse por deuant gré de ligneige et eussions paié lesdites quatre cens liures de tournois audit Abbé et au Conuent et li dis Abbés et Conuent requeist que nous entressiens en son homeige desdites choses cum nobles homs Miles Sires de Noiers lor eust donné en pure et perpetuelle armone audit Abbé et au Conuent lou fié des choses dessusdites si com il appert par les lettres dou deuant dit Seigneur de Noiers et nous ne vousissions mie entrer en l'homeige doudit Abbé et dou Conuent pour si poul de chose Nos façons a sauoir a tos que nous auons eu et receu arriers doudit Abbé et dou Conuent lesdites quatre cens liures de tournois et lour auons ladite terre randue quite et deliure et tout ce que nous y auons et poons auoir pour la reison de ladite rescosse ou por aultre reison saul çou que nos retenons por nos et por nos hoirs a nos et a nos hoirs permenablement nostre garde és choses dessusdites Et por ce que ceste chose soit ferme et estauble a tousiours nos li deuandis Cuens et la Contesse auons mis nos seauls en ces presantes letres Cau fu faict en lan de grace courant par mille doucens et sexante et seze ou mois d'Octobre