Charter Document - 06350092

Nos Hugues Darci Baillis d'Ausois façons sauoir a tous çaus qui verront et orront ces presantes lettres que en nostre presance por ce especiaument establis Milon li fis au Baut de Quincé a recogneu de sa propre volunté sans nulle force sans contraignement sans paor et sans nulle autre contrauention que il est homs a l'Abbé et au Conuent de Montier sainct Iean taillables et esploitables haut et bas en la main morte de ladite Eglise aus vs et aus constumes des aultres hommes que li dis Abbés et li Conuents ont en ladite ville de Quincé Et s'il auenoit chose que li dis Milon s'auouoit ou se faisoit auoer por autre Seigneur que por loudit Abbé et porloudit Conuent il quitte et ottroie audit Abbé et audit Conuent les sues choses toutes mobles et non mobles en quelque leu quil fussent trouué Renonce en ce faict ii dis Milon a toutes frainchises a tous percors et a toutes aides de droict escrit et non escrit Et por ce que ce soit chose ferme et estable a tous iors nous auons seelees ces presantes letres de nostre seel a la priere et a la requeste doudit Milon Ce fu faict en lan de grace mille deus cens sexante et dis ou mois de Mars