Charter Document - 06350090
| Charter Number: | 06350090 |
|---|---|
| Cartulary Title: | Reomaus, seu historia monasterii S. Joannis reomaensis, in tractu lingonensi, primariae inter gallica coenobia antiquitatis, ab anno Christi CCCCXXV |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1267 |
| Date type: | Internal, A.D. |
| Resource Link(s): |
|
Charter:
Vniuersis presentes litteras inspecturis Guido Dei gratia Lingonensis Episcopus salutem in Domino Nouerint vniuersi quod Dominus Andreas de Brocia miles propter hoc in nostra presentia constitutus confitetur coram nobis quod cum causa verteretur inter ipsum Andream ex vna parte et viros Religiosos Abbatem et Conuentum Reomaensem ex altera coram Officiali Lingonensi super iis que ipsi Religiosi petebant a dicto milite in villa et finagio de Riceio in omnibus talliis corueis iustitiis piscariis et vsibus nemorum et pluribus aliis et sententiatum siue pronunciatum fuisset a dicto Officiali super predictis pro ipsis Religiosis Dictus miles considerata super hoc vtilitate sua et commodo euidenti non dolo inductus nec in aliquo circumuentus vult et expresse consentit coram nobis quod pro predictis rebus que sententialiter dictis Religiosis adiudicate fuerant predicti Religiosi Abbas et Conuentus singulis annis habeant et percipiant viginti quinque libras Turonensium legalium in pecunia numerata Quam pecunie summam coram nobis promittit per solemnem stipulationem predictis Religiosis vel eorum mandato apud Riceium singulis annis reddere et gratum suum facere in quindena festi beati Andree Apostoli provt singulis annis veniet successiue Promittit etiam dictus miles per stipulationem predictam quod si in solutione predicte pecunie deficeret vel in toto vel in parte se decem solidos Turonenses pene nomine redditurum Concedit etiam dictis Religiosis plenum vsuarium in tribus nemoribus videlicet de Lansonna des Enuers et de la Forest ad vsum domus sue de Riceio De terris autem dictorum nemorum si fuerint extirpata dictus miles vult et consentit expresse quod per medium inter se partiantur vult etiam et concedit quod si Abbas et Conuentus Reomaensis ad villam de Riceio venerit quandiu ibidem moram fecerit quod in tota Riparia piscationem habeant cum rete lorra et artificiis seu ingeniis piscatoriis quibuscunque Concedit item dictus miles quod predicti Religiosi teneant et habeant domos mansos census costumas terras vineas et omnes alios reditus prata etiam cum edificiis que in villa et finagio de Riceio tenere et habere consueuerunt Pro quibus omnibus faciendis et fideliter obseruandis obligat predictus miles se et successores suos et omnia bona sua mobilia et immobilia presentia et futura vbicunque poterunt inueniri Renuncians in hoc facto omni actioni et exceptioni doli et fraudis omnique consuetudini et statuto priuilegio fori indulgentiis et gratiis a Sede Apostolica concessis et concedendis Promittit etiam dictus miles pro se et heredibus suis omnia ista fideliter obseruare iuramento interposito super sancta Dei Euangelia Promisit etiam soluere decimas dictis Religiosis pro parte que eos contingit de omnibus fructibus et prouentibus de quibus consuetum est solui in dicta villa de Riceio et quantum ad hec predicta se et successores suos iurisdictioni nostre supponit quod nos possimus ipsum et ipsos excommunicare vbicunque se transferrent et terram suam ponere sub districte sententie interdicto Incuius rei testimonium ad preces dicti militis presentibus litteris sigillum nostrum duximus apponendum Datum anno Domini millesimo ducentesimo sexagesimo septimo mense Februario