Charter Document - 06350088
| Charter Number: | 06350088 |
|---|---|
| Cartulary Title: | Reomaus, seu historia monasterii S. Joannis reomaensis, in tractu lingonensi, primariae inter gallica coenobia antiquitatis, ab anno Christi CCCCXXV |
| Charter Language: | Latin |
| Charter Origin: | Religious |
| Charter Type(s): | Promise |
| Date: | 1259 |
| Date type: | Internal, A.D. |
| Resource Link(s): |
|
Charter:
Omnibus presentos litteras inspecturis Gerardus Dei gratia Eduensis Episcopus in Domino salutem Vniuersitati vestre notum facimus quod coram nobis propter hoc constitutus Petrus de Belna Clericus dictus de Arneto recognouit quod domum siue Prioratum de Charreio prope Belnam nostre Diocesis cum suis pertinentiis tenebat et possidebat ad vitam suam tantummodo nomine donationis a Religiosis viris Abbate et Conuentu Reomaensi sibi facte Ita quod post decessum ipsius Clerici dicta domus cum dictis pertinentiis et meliorationibus ibidem factis vtensilibus et supellectilibus in loco predicto repertis ad dictos Abbatem et Conuentum libere et pacifice reuertentur Recognouit siquidem dictus Clericus coram nobis et bona fide promisit domum siue Prioratum predictum edificia domos prata et vineas et alia bona loci predicti se tenere et conseruare in eodem statu vel meliori in quo erant tempore donationem antecedente et eandem domum dimittet liberam quitam et absolutam ab omni onere debitorum Nihilominus dictus Clericus recognouit et promisit bona fide coram nobis quod cuidam Monacho Reomaensi in loco predicto commoranti vel non commoranti in viginti libris Diuionensibus et duobus modiis vini annuatim infra festum omnium Sanctorum persoluendis integre et pacifice prouidebit Et insuper idem Clericus quandiu dictam domum tenebit ad soluendum quascunque procurationes seu alias missiones a dicta domo debitas se coram nobis specialiter obligauit Preterea memoratus Clericus dictorum Religiosorum deuotionem super premissis liberaliter sibi factam benigne considerans partem illam et totum ius quod habet vel habere potest in decima bladi de Sarrigneio vel feudo ipsius decime pro remedio anime sue et antecessorum suorum in eleemosynam perpetuam eisdem Religiosis coram nobis dedit in perpetuum et concessit et eosdem super hoc coram nobis inuestiuit retento tamen ad vitam suam tantummodo vsufructu et dictam donationem idem Clericus tenetur bona fide iam dictis Religiosis erga quoscunque garantire Super his autem omnibus et singulis firmiter tenendis et obseruandis iuramento in manu nostra super hoc prestito obligauit se dictus Clericus et omnia bona sua coram nobis supponendo se et sua nostre iurisdictioni vt ad tenendum et seruandum omnia et singula supradicta ad requisitionem dictorum Religiosorum eundem Clericum si necesse fuerit per excommunicationis sententiam compellamus In cuius rei notitiam ad requisitionem et instantiam ipsius Clerici presentes litteras sigilli nostri duximus munimine roborandas Datum anno Domini millesimo ducentesimo quinquagesimo nono mense Iunij