Charter Document - 06350079
| Charter Number: | 06350079 |
|---|---|
| Cartulary Title: | Reomaus, seu historia monasterii S. Joannis reomaensis, in tractu lingonensi, primariae inter gallica coenobia antiquitatis, ab anno Christi CCCCXXV |
| Charter Language: | Latin |
| Charter Origin: | Lay |
| Charter Type(s): | Agreement |
| Date: | 1243 |
| Date type: | Internal, A.D. |
| Resource Link(s): |
|
Charter:
Ego Andreas Dominus Rubeimontis miles notum facio vniuersis presentes litteras inspecturis quod cum inter me ex vna parte et Rainaldum Abbatem ac Conuentum Reomaensem et homines ipsorum ac feminas de Estiueo ex altera contentio verteretur super hoc quod inquietabam et impediebam supradictos homines et feminas et eorum animalia super vsuagiis in pascuis animalium et pasturis de toto territorio et finagio qui vocatur Boscus Dei et de finagio de Sarragneio et super hoc quod inquietabam eosdem super vsuagio ad adaquandum animalia sua et ad agiandum lina sua et canabos et ad abluendum pannos suos et lanas in Riparia mea de Rubeomonte et ad ipsam aquam bibendam et portandam provt sibi expedire videretur Tandem habito bonorum consilio facta compromissione hinc inde in bonos viros et per ipsos super premissis inquisita diligentius veritate per ipsorum relationem et alio modo mihi constitit euidenter quod ipsos Abbatem et Conuentum et maxime homines et feminas eorundem de Estiueo super premissis indebite molestabam vtpote nullum ius habens penitus in predictis Inde est quod ego volo dono et concedo quod tam dicti Abbas et Conuentus quam ipsorum homines et femine de Estiueio vti valeant predictis vsuagiis in perpetuum libere et quiete Promittens iuramento prestito quod ipsos vel eorum alterum super premissis per me vel per alium nullatenus molestabo Sed ad maiorem explanationem volo dono et concedo eisdem in toto terragio et finagio qui dicitur Boscus Dei et in toto finagio de Sarregneio vsum predictum in pascuis animalium et pasturis et aliis vsuagiis ad animalia necessariis et quod vsum suum habeant in perpetuum libere et pacifice in dicta Riparia de Rubeo monte ad adaquandum animalia sua et ad agiandum lina sua et canabos et ad abluendum pannos suos et lanas et ad bibendum aquam et portandum provt sibi viderint expedire et hec in ea libertate eisdem iuramento prestito garantire promitto et heredes meos ad hec in perpetuum volo teneri Et hoc voluerunt et concesserunt et laudauerunt Elisabeth vxor mea Andreas et Ioannes filij mei in mea presentia constituti In cuius rei testimonium presentes litteras sigilli mei munimine roboraui et in forma consimili eisdem facere et tradere teneor quam cito se facultas obtulerit litteras sigillo Archiepiscopi Lugdunensis sigillatas vel alicuius persone authentice que ad hoc sufficerent si dicte littere Archiepiscopi haberi non possent Et quam cito fuerit Archidiaconus in Archidiaconatu Tornodorensi alias litteras eisdem facere et tradere teneor in eadem forma suo sigillatas sigillo continentes quod tam in me quam in heredes meos et in terram meam excommunicationis vel interdicti sententiam valeat promulgare si me vel heredes meos a supradictis contigerit resilire Actum anno Domini millesimo ducentesimo quadragesimo tertio mense Februario