Charter Document - 06350062
| Charter Number: | 06350062 |
|---|---|
| Cartulary Title: | Reomaus, seu historia monasterii S. Joannis reomaensis, in tractu lingonensi, primariae inter gallica coenobia antiquitatis, ab anno Christi CCCCXXV |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1215 |
| Date type: | Internal, A.D., Feast |
| Resource Link(s): |
|
Charter:
Nouerint vniuersi ad quos littere presentes peruenerint quod cum nos Abbas et Conuentus Reomaensis ex vna parte et ego Guido Dominus de Iuleio ex altera litigaremus coram Decano Capelle Diuionensis et Coniudicibus suis a Domino Papa delegatis super permutatione oblationum Capelle de Iuleio tandem post multas altercationes composuimus in hunc modum Quod nos Abbas et Conuentus Reomaensis concessimus Domino Guidoni et Clericis seruientibus in Capella de Iuleio oblationes que ibidem fient a Domino Guidone et vxore sua et hospitibus suis et familia sua illis scilicet quos Dominus Guido tenebit propriis expensis tam in victu quam in vestitu saluo iure Parochiali Ecclesie de Iuleio in omnibus tam in decimis quam in aliis que hic specialiter non exprimuntur Si vero alios Parochianos de Iuleio in eadem Capella offerre contingat Clerici Capelle tenentur per fidelitatem suam Presbytero et Priori reddere oblationes eorum Et ego Guido Dominus de Iuleio in recompensationem oblationum dedi et concessi dictis Abbati et Conuentui et Curato de Iuleio dimidium modium bladi in decima de Fulcheriis annuatim percipiendum tertiam partem frumenti et tertiam hordei et tertiam auene cuius medietas Monachorum est et medietas alia Capellani Si vero de parte quam ego habeo in predicta decima tota summa illa non possit persolui in molendino meo de Ferreio residuum persoluetur Et hoc laudauit Petronilla vxor mea Concessi etiam ego Guido et creant aui quod de cetero nec ego nec alius de mandato meo vel assensu procurabit augmentum Capelle sepe dicte in detrimentum vel lesionem matricis Ecclesie nec Monachi similiter vel Curatus augmentum Ecclesie matricis procurabunt in detrimentum vel lesionem Capelle memorate Concessi etiam quod si Capella predicta quod absit remaneat Clericorum seruitio destituta oblationes predicte ad matricem Ecclesiam reuertentur et istas constitutiones iurauerunt Huo Presbyter Ioannes Boucharz Thomas de Fulcheriis se fideliter obseruaturos et successores eorum et Vicarij tam ab illis quos hic nominauimus quam a successoribus eorum constituti ad obseruandum similiter iurare tenentur ante quam dicte Capelle beneficio inuestiantur Et vt factum istud ratum et stabile permaneat ego Guido Abbas Reomaensis et ego Guido Dominus de Iuleio sigillorum nostrorum munimine roborauimus Actum est hoc anno ab Incarnatione Domini millesimo ducentesimo decimo quinto die Mercurij ante natiuitatem beate Marie