Charter Document - 06350001

Seruos Dei quorum virtutibus gloriamur et orationibus defensamur si nobis amicos aquirimus honoribus sublimamus atque obsequiis veneramur statum regni nostri perpetuo augere credimus et seculi gloriam atque celestis regni patriam adipisci confidimus Quapropter notum sit omnibus Episcopis Abbatibus et inlustribus viris magnificis Ducibus Comitibus Domesticis Vicariis Graphionibus Centenariis et omnibus curam Sancte Dei Ecclesie gerentibus per nostrum regnum discurrentibus tam presentibus quam futuris Quia Dominus Ioannes clarus virtutibus locellum suum in pago Tornotrinse sub Regula Beati Macarij ad habitationem Monachorum constructum qui Reomaus vocatur primo nostro suscepte Christianitatis atque subiugationis Gallorum anno nostre celsitudini tradidit et commendauit vt sub nostra emunitate et mundiburdio nostrorumque successorum Regum semper maneat Propterea et nos ipsum peculiarem patronum nostrum cuius merito omnes hostes nostros vincere credimus taliter honorauimus vt quantumcumque suo asino sedens vna die circa locum suum nobis traditum et commendatum de nostris fiscis circuisset perpetuo per nostram regalem munificentiam habeat et quod ipse nobis nosque illi contulimus iure hereditario tam nos quam nostri successores Reges teneant in omni defensione reclamatione aduocatione et immunitate nullique vnquam dignitati nullique Ecclesie propter meritum tanti patris subdatur et conferatur Monachis vero ibidem per diuersas cellulas manentibus seu mansuris omnia necessaria secundum numerum quo fuerint a nobis et successoribus nostris Regibus ex nostro censu Regio prebeantur Ideoque has literas manu nostra firmatas ipsi nostro Patrono Domino Ioanni dedimus Id omnino vos rogamus atque decernimus vt nec nos nostrique successores Reges neque vos vestrique minores nec vllus quilibet de iudiciaria potestate de vernes curtes vel rebus ipsius Monasterij in quibuslibet pagis vel territoriis in regno Deo propitio nostro nostrorumque successorum Regum futuroque bono ipsius Monasterij quod vel ab ipso Patrono Ioanne vel a nobis est concessum seu a suis progenitoribus ipsi et nobis datum et hereditate vel iudicio fuerit delegatum tam ex munere nostro quam de paterno et proprio vel in reliquum de comparato aut de conlato populi seu de quolibet adtracto aliquid auferre presumat Et pro ipsa oasa Dei aut ipso patrono nostro tam ciues quam coloni ac Gasindi suscepti si aliquid violenter rapuerint Dei nostrorumque terrore percussi ad integrum reddant Et nemo predictas res eorum inquietare audeat nec in eorum vicos vel villas et curtes ad causas audiendas nec ad mansiones faciendas nec freda exactanda nec vllas functiones requirendas ingredi presumat Sed sub nostra nostrorumque Regum successorum tuitione et mundiburdio predictum Monasterium propter meritum tanti patroni permaneat et quiescat Et quod a nobis circa ipsum peculiarem nostrum Patronum Dominum Ioannem conceditur et conseruatur hoc a nostris successoribus Regibus pro ipso patrono nostro ac pro ipso loco sancto ad successores suos quos ex suis elegerint semper sit conseruatum nec vllas requisitiones nec repetitiones nec vllum impedimentum a iudicibus publicis pertimescant Vnde ipsa congregatio pro tempore tanti Patroni eiusque successorum pro stabilitate regni nostri et salute patrie Domini misericordiam iugiter debeat exorare Et vt hoc preceptum firmius habeatur et per omnia tempora conseruetur manus nostre signaculo subter illud decreuimus roborare ac signo crucis quo sacramur auctorauimus Signum Clodouei fortissimi Regis datum sub die IIII Kalendas Ianuarias Indictione V Actum Remis ciuitate in Dei nomine feliciter Ego Anachalus obtuli anno Magni Clodouei XVI