Charter Document - 06349005

A touz ces qui verront et orront ces presentes leitres freres Droues abbes et touz li couvenz de l'eiglise de Moloimes salut en Nostre Seignour Saichient tuit que cum Lamberz diz Bodins de Ricé et Margueire sa famme aient donné quicté et outroié en pure aumone a nos et a nostre esglise de Moloimes lour maison qui fu Garchom lour devant leu four lour maison selonc Robert Saussier lour grange dou pont lour grant maison neuve lour vigne de Vaulongrain lour vigne qui fu Galam en Chansés lour vigne qu'an dit Rotie lour grant vigne de Chansés lour vigne des Trées lour vigne dou Chatele lour vigne de la voie Boisselainge lour pré de la Cortainne lour pré dou Bruiant tele partie cum il ont ou pré avec les malades leu quart de demie sée avec Sauget une sée dou pré Boton lour pré dessus la Folie lour lamme selonc leu molin la terre derriers la maison neuve lour meis devant leu molin lour meis qui est en Auterive et nos aient quicté touz les harietaiges qui mouvoient de nostre esglise et que nos lour avoiens donnés a lour vies et avec tous ceu il nos aient donné et quicté touz lour autres biens meubles et non meubles quecunque il soient et en quecunque leu il sunt des quex chouses harietaiges et meubles il se sunt ja desveituz et en ont reueitu frere Pierre moinne nostre chamberier en nom de nos et de nostre esglise de Moloimes nos pour la grant affection et la grant devotion que lidiz Lamberz et sa famme ont ades heue et ancor ont a nostre esglise les acompaingnons et façons participanz de touz les biens qui seront faiz de ci en avant en orasons et en aumones en nostre esglise et es membres de celi et lour prometons a um chascum d'aux autant de servise apres lour deces comme a l'um de noz freres et en recompansation dou dom devandit fait a nos nos donnons et outroions au devandit Lambert et a Margueire sa famme tant cum il vivront chascum am dix muix de vim bon et souffisant a la mesure de Moloimes et prevande de paim conventual chascum jour pour um chascum et prevande de paim a converse chascum jour pour lour beasse et vint et cinc soz tornois chascum am pour um porc vif et toutes les semainnes qu'an maingera char doux fromaige provendaux et en la karoime et aus avanz chascum jour quatre arans ou doux generaux tex cum li convenz aura et chascum am um bichet de pois et um bichet de feves a la mesure de Moloimes et chascunne semainne une charrete de buiche et doux soz tornois por pictance a paier a aux leu diemonge et chascum am doues paires de bones robes souffisanz a aux tant cum il vivront ansamble et l'um d'aux mort cil qui sorevivra aura soulemant la moitié de toutes ces chouses devandites forz que tant qu'il aura prevande de pain a converse avec la soue prevande de pain conventual por sa beasse c'est a savoir cil d'aux qui sorevivra aura sa single prevande de paim conventual et prevande de paim a converse por sa beasse cinc muix de vim chascum am en la quinzainne une charrete de buiche chascunne semainne douze deniers et um fromaige prevandau ou chascum jour tel generaul cum li convenz aura chascum am um metiom de pois et um de feues et douze soz et sex deniers pour um porc Et aux mors nos et nostre esglise seront quicte et assot de ce dom devandit fait audiz Lambert et Margueire sa famme a lour vies si cum il est dessus dit Et toutes ces chouses devandites si cum elles sont ci dessus escrites et devisées mot et mot nos lour prometons a tenir et a garder fermemant sanz corrumpre et sanz aler ancontre en tout ne am partie de queque chouse que ce soit Et pour ceu que ceu soit chouse ferme et estauble nos abbes et li couvenz de Moloimes devandit avons mis noz seaux en ces leitres que furent faites l'am Nostre Seignour mil doux cens quatre vinz et sex leu sambadi apres les huitauves de la Tout Sainz et les avons bailiés et delivrés au commandement doudit Lambert et sa famme saelées de noz seaux