Charter Document - 06340757

Nos Theobaldus Dei gratia rex Navarrie Campanie et Brie comes Palatinus notum facimus universis tam presentibus quam futuris quod viri religiosi Xpistoforus abbas Molismensis et ejusdem loci conventus in omni eo quod habent in hominibus et feminis et bosco et plano apud Coiphy et apud Vi et in remanencia quam habent in dictis villis me et heredes meos in perpetuum associant et medietatem emendarum et escheitarum hominum et feminarum quas habent in prefatis villis michi et heredibus meis concedunt in perpetuum possidendam et iterum medietatem censuum terragiorum et abonamentorum que debent recipi in domibus ipsorum apud Coiphy et apud Vi tam de mandato ipsorum quam de mandato nostro et tunc per medium dividentur tali condictione quod in dictis villis et finagiis earumdem in hominibus et feminis dicte societatis ubicumque morentur in mea justicia vel in justicia monachorum dictorum medietas justicie et abonamentorum mea vel heredum meorum erit et altera medietas erit in perpetuum abbatis et conventus predictorum Si vero aliquis hominum vel feminarum dicte societatis sine corporis sui herede decesserit medietatem hereditatis que ad me vel ad heredes meos racione eschaite deveniret in manu nostra non poterimus detinere nec alicui vendere dare nec conferre nisi hominibus vel feminis dicte societatis Similiter dicti abbas et conventus medietatem hereditatis que ad ipsos racione eschaite predicte deveniret non poterunt in manu sua detinere nec alicui vendere dare vel conferre nisi hominibus dicte societatis Mobilia vero si que fuerint legatis et debitis primo persolutis inter ipsos et me vel heredes meos per medium dividentur In reditibus proventibus terris pratis decimis et rebus aliis que habent in dictis villis et in finagiis earumdem ego aut heredes mei nichil capient integraliter et habebunt exceptis rebus supradictis in quibus nos et heredes nostros associaverunt specialiter et expresse Omnia vero bona ad dicta loca pertinencia ego et heredes mei tamquam nostra propria tenemur custodire bona fide sine prejudicio juris alieni Si autem contigerit quod homines vel femine ipsorum de Molismo sive de altera terra ipsorum ad dictas villas per maritagium sive alio modo venerint moraturi de societate supradicta erunt Et si homines vel femine de villis supradictis apud Molismum sive ad aliam terram dictorum monachorum per maritagium vel alio modo venerint moraturi sine reclamatione mea vel heredum meorum libere et integre erunt ecclesie memorate Similiter si homines mei ac femine mee vel heredum meorum in dictis villis mansionem fecerint vel per maritagium juncti fuerint cum hominibus dicte societatis [inter me et heredes meos et dictos monachos erunt communes Ego vero aut heredes mei nullum hominem sive feminam de villis predictis in terra nostra poterimus retinere nec defendere contra ecclesiam Molismensem Quod si recedebant de locis dicte societatis] nos et heredes mei et dicti monachi tantumdem haberemus in eis quantum habebamus quando manebant in locis supradicte societatis Et sciendum est quod quocienscumque apud Molismum abbas constituetur novus homines et femine predictorum locorum fidelitatem facient novo abbati constituto Similiter facient fidelitatem comiti Campanie qui novus veniet ad regimen comitatus Trecensis Et ne aliquis prepositorum vel servientium meorum in dictis hominibus et feminis in villis et finagiis earumdem aliquod dominium vel justiciam velit reclamare aut audeat exercere prepositus de assensu dictorum monachorum et meo vel heredum meorum pro dicta societate servanda in dictis villis statuetur et faciet juramentum fidelitatis dictis monachis et michi vel heredibus meis antequam de prepositura se intromittat et si se ante intromitteret sexaginta solidos emendaret que emenda per medium dividetur Si prepositura vendatur de communi assensu vendetur et precium vendictionis inter me vel heredes meos et dictos monachos equaliter dividetur Prepositus vero de medietate dicte vendictionis antequam de prepositura se intromittat bonos plegios aut securitatem competentem dabit monachis memoratis et michi vel heredibus meis de alia medietate Si autem prepositura non vendatur prepositus omnium acquisitorum donorum et exactorum de quocumque loco veniant vel quocumque modo fiant ratione dicte societatis per juramentum suum reddet dictis monachis medietatem et michi vel heredibus meis alteram medietatem Evoluto autem anno prepositus dictarum villarum vel ex toto mutabitur vel de novo restituetur quod si restituatur juramentum fidelitatis faciet tamquam novus Si vero abbas et monachi in dictis hominibus et feminis rogatam fecerint sicut solet fieri inter ipsos et me vel heredes meos erit commune quicquid acceperit ab eisdem Similiter in omnibus modis et commodis que ego aut heredes mei a prefatis hominibus et feminis prece minis vel gracia seu alio quolibet modo habuerimus per medium dividentur Preterea sciendum est quod homines et feminas dictarum villarum ego aut heredes mei aut mandatum nostrum numquam pro aliqua necessitate neque pro exercitu aliquo ultra duas dietas ducere poterimus ita quod die tercia vel quarta sequenti ad hospicia sua redire valeant competenter qui autem ad submonitionem dicti regis vel heredum meorum comitum Campanie vel mandati nostri ire contempserit vel non ierit decem solidos pruviniensium reddet pro emenda quorum medietas erit dictorum monachorum et altera nostra que submonicio quotienscumque facta fuerit per priorem de Varenis fiet Et si ego aut heredes mei in sepe dictis villis vel in finagiis earumdem aliquid acquisierimus bona fide medietatem acquisitorum nostrorum habebunt monachi memorati prius ab ipsis medietate probatorum sumptuum persoluta Et similiter si dicti monachi in dictis villis vel in finagiis earumdem aliquid acquisierint ego et heredes mei bona fide medietatem acquisitorum habebimus prius a nobis medietate probatorum sumptuum persoluta Ego etiam et heredes mei in jam dictis villis et in finagiis earumdem nichil facere poterimus neque statuere sine assensu et voluntate abbatis et conventus predictorum neque destituere constitutum Gistum etiam in dictis villis capere non poterimus neque in finagiis earumdem nec aliquam omnino servitutem a dictis hominibus et feminis requiremus nec requiri faciemus nisi secundum quod superius est expressum In nemoribus autem de Coiphy et Vi quorum fundus et dominium sunt ecclesie Molismensis forestarii de assensu meo et heredum meorum et dictorum monachorum statuentur ad dicta nemora custodienda qui dicti forestarii per juramentum suum nobis et ipsis prius prestitum coram mandato ipsorum et nostro in domibus prioris de Varenis apud Coiphy fideliter computabunt et dictis monachis per juramentum suum reddent medietatem et aliam michi et heredibus meis Similiter de pannagiis et de omnibus rebus aliis que ratione nemorum possunt vel debent exigi vel recipi dicti monachi recipient medietatem et ego vel heredes mei aliam medietatem De dictis vero nemoribus quocienscumque fuerit facta vendicio precium vendicionis que de communi assensu debet fieri inter ipsos et me vel heredes meos per medium dividetur ita tamen quod de dictis nemoribus capient dicti monachi quicquid sibi necesse fuerit ad usum prioratus sui de Varenis et dictarum villarum cum appendiciis suis et etiam ad usus prioratus sui Sancti Desiderii Lingonensis pro omnibus aisan iis suis faciendis tam in grosso quam in gracili jacente et stante sicco et viridi a pede usque ad cimam Similiter ego et heredes mei comites Campanie omnimodum usuarium in dictis nemoribus habebimus pro aisanciis propriis nostris faciendis tam in grosso quam in gracili jacente et stante sicco et viridi a pede usque ad cimam de nemoribus vero supradictis ego nec heredes mei alicui conferre aliquid poterimus nisi de assensu abbatis et conventus predictorum similiter de dictis nemoribus ipsi dare non poterunt sine assensu meo vel heredum meorum Hanc autem societatem fecerunt dicti abbas et conventus salvis sibi usuariis terris pratis decimis corveiis reditibus proventibus et rebus aliis que habent tam in dictis villis quam in finagiis earumdem exceptis rebus supradictis in quibus me et heredes meos associant specialiter et expresse sicut est superius annotatum Et sciendum est quod neque pro pace aliqua neque pro casu aliquo nec ego nec heredes mei societatem istam in alia manu ponere neque dare aut commendare poterimus quam in manu nostra sed quicumque comes erit civitatis Trecensis dictam societatem in manu sua propria tenebit qui etiam comes et ejus successores quando erunt novi domini militem unum in animas suas jurare facient quod hec omnia bona fide tenebunt et firmiter observabunt requisiti ab abbate Molismensi nec in aliquibus proventibus dictarum villarum vel finagiorum earumdem aliquid percipient donec dictum prestiterint juramentum Ut autem hec omnia rata et inconcussa permaneant et in perpetuum inviolabiliter observentur litteris adnotata sigilli nostri fecimus munimine roborari Actum anno Domini MCCL mense julio