Charter Document - 06340737

Noverint universi sancte matris ecclesie filii quod ego Hugo Baldulfus dominus Brecensis anime mee predecessorumque meorum saluti consulere desiderans Deo et Beate Marie Molismensi et venerabili primoque Molismensis cenobii abbati Roberto totique ejusdem ecclesie capitulo et monachis quos ad sibi serviendum in cenobio in cultura mea que Piceas dicitur edificato et fundato me ministro et datore loci divina congregavit gratia villam nomine Paiacum cum ecclesia et oblationibus ejusdem ecclesie et homines quotquot ibi habebam cum uxoribus et infantibus et omnes justicias consuetudines et corveias roagium tholoneum edictum et furnum et quecumque in eadem villa possidebam uxoris mee Emeline filiorumque meorum Symonis et Bartholomei concessione in perpetuam elemosinam tradidi et concessi His etiam donis et beneficiis superaddidi capellam que est ad fontem de Luxineio et ecclesiam de Baia duasque partes totius minute decime et feni et in Purificatione beate Marie omnes candelas totamque magnam decimam cum decima carrucarum mearum exceptis tribus modiis annone qui ad sacerdotem ejusdem ecclesie pertinent scilicet modio frumenti modio siliginis modio avene Siquidem prior de Paiaco vel monachus ex parte ejus singulis annis in natali apostolorum Petri et Pauli in ecclesia Baye missam debet celebrare cui inquam priori vel monacho suisque ministris dominus Baye procurationem die illa honorifice tenetur preparare ipse vero pro tali procuratione homines in festis sancti Petri ceram et nummos pro suis capitibus debentes et ceram et nummos quos debent perhanniter debet possidere Preter hec etiam Peiacensibus monachis dedi et concessi quicquid in decima Ville Nove tam grossa quam minuta possidebam decimamque carrucarum mearum Brecensium cum duabus partibus omnimode decime castri Brecensis et Peiaci exceptis duobus modiis annone uno frumenti altero siliginis et dimidio modio vini quos Peiacenses monachi canonicis Sancti Blitarii sunt reddituri Dedi etiam eisdem monachis terram que est a terra Guarini filii Theobaudi usque ad terram Walterii filii Reheldis forique Brecensis salagium cum tholoneo et justicia ad salagium pertinentibus Pretaxatis vero donis adjunxi quod quicumque homo sive liber sive servus Peiacensi ecclesie aliquid in elemosinam dederit et quicquid de casamentis meis eidem ecclesie impartitum vel datum fuerit vel etiam monachi prefati in Brecensi dominio emptione vel quocunque alio modo acquisierint illud inquam pacifice possideant et quiete Addidi etiam quod si aliquis a Brecensis dominii terra fuerit exulatus et repatriare voluerit volens Peiacensium fratrum collegio aggregari Brecarum domino nullatenus obviante liceat ei cum eis pacifice conversari Addidi etiam quod si aliquis alienigena nulli dominio de jure servire astrictus alicubi in villa vel in terra monachorum habitaverit vel etiam si quod frequenter accidit per aliquam villam monachorum iter faciens universe carnis debitum exsolverit monachi tam corporis quam rerum ipsius dominentur libere et absolute Preterea si aliquis homo vel femina eorundem monachorum alicubi in villa vel in terra domini Brecensis habeat mansionem liceat eis in eos commodam justiciam exercere Quicquid etiam terre arabilis prefati monachi propriis carrucis excolere potuerint sine omni consuetudine et terragio teneant et possideant Pascua vero que ubicumque in Brecensi dominio continentur qualiacumque sint sive nemoralia sive campestria tam monachorum quam suorum hominum vel hospitum animalibus dampna si qua de pascendo intulerint restaurando communia sint Quicquid etiam nemoris ad edificationem vel reparationem monasterii seu domorum vel grangiarum vel ad alios usus monachis opus fuerit in quodam nemore Brecensi quod dicitur Chapetuns eis libere tribuo et concedo Si vero Domino suffragante aliquam domum sive domui appendiciam in Brecensi dominio edificaverint illa etiam domus in quibuslibet usibus sibi necessariis nemoribus meis de Chapetuns in perpetuum utatur Homines autem et hospites prefate ecclesie Peiaci in eadem villa vel in parrochia ville commorantes in quodam Brecensi nemore quod dicitur Chapetuns usuarium habeant secandi paxillos ad vineas et quelibet ligna preter quercum et fagum perhemnem licentiam habituri ramos etiam cujuslibet quercus vel fagi quantecumque fuerint cum quercu et fago si aride sint et satonem ad alia ligna colliganda de quolibet nemori succisuri Ligna etiam a tali usuario habita inter se mutuo vendere et emere nullatenus prohibeantur In hujus autem muneris recordationem singule domus vel familie prefate ville Peiaci excepta monachorum domo quam erga dominos Brecenses ab omni consuetudine immunem et liberam fore firmavi et institui pro singulis ignibus duos panes duosque denarios domino Brecensi annuatim persolvent Preter hec autem Brecensibus dominis et monachis Peiacensibus hoc esse commune institui ut hominibus vel mulieribus tam Brecensis domini quam Peiacensium monachorum absque contradictione liceat alternis conjugiis sociari hoc utrumque jure servato quod cujus mater fuerit ejus erunt et infantes hereditate pueris libera remanente porro eorum hereditates qui sub tali communitate matrimonia contraxerint si sine filiis vel filiabus obierint propter manum mortuam dominis suis possidende remanebunt Ceteris etiam donis superaddidi villam Curgenensem et ejusdem ville homines et feminas quotquot ibi habebam et omnes justicias consuetudines et corveias ejusdem ville et Ville Venardi et de Voisi et de Chavineio et alnetum per lou Noeiz usque ad filum aque et omnes finagium per Dumum Brunelli et per la Haie Erardi et per lou Nageiz usque ad nemus et usuarium in quodam nemore quod dicitur les Noes et in viridi et in sicco tam monachis quam hominibus eorum vel hospitibus perhemniter possidendum et omnia alia quecumque in eadem villa vel in ejusdem ville finagio ad possessionem meam pertinebant pratum etiam quoddam quod vocatur Dominium juxta Villam Venardi situm et aliud pratum quod subjacet ville que Curia dicitur similiter et aliud secus Pontem Sancti Prejecti et terram clausi de Monte Bloveno et superiorem et interiorem et quicquid terre ibi habebam Hec inquam omnia pro anime mee et patris mei uxorisque mee ac puerorum meorum salute Molismensi ecclesie et Peiacensibus monachis tradidi et perhemniter possidenda concessi Et ne quis in posterum his institutionibus et largitionibus temere obviare presumpserit presenti carte sicut patet sigilli mei munimen et roboramen adhibui Actum est hoc et confirmatum Trecis anno incarnationis domini nostri Jhesu Xpisti MC quarto