Charter Document - 06340602

In nomine sancte et individue Trinitatis Ego Hugo miseratione divina Senonensis archiepiscopus universis fidelibus tam presentibus quam futuris in perpetuum Quanto in omni religione ecclesiastica et in universa celestis conventus gloriosa re publica virginale decus propensioris est meriti et glorie tanto majori est a nobis prosequenda et attollenda favore Unde presentes virgines a conventu Juliacensi ex precepto domni Guilenci venerabilis Molismensis ecclesie abbatis precibus et optentu domine Petronille Barrensis comitisse in archiepiscopatu nostro ad locum qui vulgari consuetudine Frigidus Mantellus appellatur advenisse et easdem nos suscepisse gaudemus sperantes earum precibus et temporali nos prosperitate gaudere et celestis vite sempiterna gaudia possidere Nos autem et vivorum et defunctorum utilitatibus providentes premissum locum ab omni laice et secularis potestatis jugo penitus absolutum divine servituti liberum reddimus et mancipamus salvo videlicet archiepiscopali jure salvo nichilominus perpetuo Molismensis ecclesie dominio cimiterium in eodem loco benedicentes et altare in honore Domini et gloriose Genitricis consecrantes quatinus prefixus locus sit domus orationis sit vivorum refugium sit sepultura defunctorum Dispensationis igitur nostre gratia liceat omnibus qui non propter propriam culpam excommunicati fuerint in predicto loco omne misericordie et xpistianitatis consequi suffragium ex consensu tamen et permissione propriorum sacerdotum defunctis videlicet sepulturam mulieribus reconciliationem reis et fugitivis impunitatem Decrevimus etiam et sub anathemate statuimus ut prefatus locus nullatenus antiquo deinceps vocabulo nominetur sed ad declarandam circa eundem locum mutationem dextere Excelsi Libera Vallis appelletur Notandum sane quod in adventu predictarum virginum tota patria exultante et sollempni occursu ad tam celebrem processionem confluente comes Henricus Guillelmus Nivernensis et Guillelmus filius ejus Tornodori comites et cum eis quam plures barones occurrerunt scilicet dominus Milo de Erviaco Ansericus de Monte Regali Milo de Noeriis et domina Petronilla Barrensis comitissa fundatrix premissi loci que et ipsa easdem sanctimoniales ibi adduxit cum liberis suis Manasse Teobaudo Hemensanni quorum omnium assensu et voluntate presens negocium terminatum est et approbatum Concesserunt vero prelibati comites ut quicumque de casamentis suis pretaxatis monialibus aliquid vel dare vel vendere voluerit libere et sine calumpnia possideant Comes quoque Henricus quinquaginta solidos annuatim eis largitus est Predicta autem comitissa premissorum liberorum suorum voluntate et assensu concessit eis usuarium in nemoribus suis ad omnia necessaria sicut ejusdem homines habent et de casamento suo quicquid omnimodis acquirerent libere possidendum Similiter Raherius vicecomes de Sancto Florentino concessit eis quicquid de suo casamento habere poterunt libertate perpetua possidendum hoc idem et omnes nobiles qui ibi convenerant fecerunt Nec pretereundum quod dominus Guiardus de Nuevi concessit eisdem per manum nostram partem suam decime de omni agricultura que omnino augeri vel multiplicari poterit in grangia que appellatur Aigremont et minutam decimam de parrochia de Nuevi et decimam de Altrevile et IIII falcatas prati Porro Juliacenses concesserunt prefixis sororibus suis in separatione mutua VII annuos solidos quos habebant pro Adelina matre Herberti de Poisuels Actum est hoc apud Liberam Vallem anno Verbi incarnati MCLIX die octava apostolorum Petri et Pauli ciclo solari VIIX indictione VII concurrente III epacta nulla Affuerunt nobiscum cum predictis proceribus et vulgo communi quam plures persone ecclesie nostre Guillelmus Senonensis ecclesie prepositus Odo decanus Matheus precentor Theo cellerarius Guido Milidunensis archidiaconus Hugo de Avalone Stampensis Manasses Trecensis archidiaconi Robertus Teobaudus Gauterius canonici Ut autem hoc ratum et inconcussum permaneat sigilli nostri auctoritate fecimus roborari decernentes ut quicunque hanc nostram confirmationem post secundam aut terciam commonitionem violare temptaverit a corpore et sanguine Domini alienus existens anathematis gladio feriatur in menbris et corpore diaboli numerandus Data apud Liberam Vallem per manum Fromundi capellani et notarii nostri