Charter Document - 06340565

Ego Henricus Trecensium comes posterorum commendo notitie quod dilectus meus Andreas dominus de Feritate Gaucherii precibus et monitis Thome venerabilis abbatis Molismensis me adire curavit et rogare ut elemosinas ab antecessoribus suis collatas Domui Dei de Feritate Gaucherii ad Molismensis ecclesie jurisdictionem spectanti testimonio sigilli mei confirmarem et ego quidem libenter annui earumque elemosinarum tenorem presens pagina manifestat ipsam scilicet domum que Domus Dei vocatur cum omnibus ejus appenditiis id est terra ad eandem Domum Dei pertinente que omnia bone memorie Gaucherius quondam dominus de Feritate Gaucherii Deo et beate Marie Molismensis ecclesie jure perpetuo sub hac libertate tribuit possidenda ut in villa eidem Domui Dei contigua et subjecta cujus etiam justitia tota est monachorum Deo ibi servientium nec ipse nec heredes sui nec eorum ministri latronem vel reum aliquem deinceps caperent vel consuetudinem ibi aliquam haberent Si quis vero clericus vel miles liber vel servus vel ejusdem Domus Dei famulus sive sanus sive infirmus ibi velit aliquid pro sue anime remedio dare totius contradictionis obstaculum dictus Gaucherius sibi suisque posteris in hoc maxime penitus amputavit adiciens et statuens ut in eadem villa Domus Dei annuatim per ebdomadam unam continuam nundine celebrentur tam in die jovis quam ceteris diebus cum enim semper die jovis mercatum sit in castro Feritatis Gaucherii nisi tunc solummodo cum apud Domum Dei nundine celebrantur ut earum ebdomada sit integra nec ullum tunc sit in castro mercatum et hoc de consensu predicti Gaucherii et heredum ejus idcirco pre ceteris hic diebus de die jovis feci mentionem Decernit quoque idem Gaucherius mercatores liberos ibi esse et absque tributo qui per Feritatem ad easdem irent nundinas et redirent et ut absque calumpnia et inquietudine telonearii et aliorum ministrorum forent qui in ipsa villa Domus Dei aliqua hora hospitari aut pernoctari vellent quarum utique nundinarum redditus theloneum justitia bannum latro et quicquid est in nundinis justitie et juris totum est monachorum Domus Dei Dedit etiam eis pro anima uxoris sue Elizabeth sexaginta solidos ad vestiendos eos et tres salis et tres olei sextarios annuatim eisdem reddendos ad festum sancti Remigii a theleonario et hoc donum tam idem Gaucherius quam Helias filius ejus super altare Domus Dei sollempniter posuerunt concedentes eisdem monachis usu[arium in] nemoribus suis ad omnia que eis necessaria forent tam ad ignem suum et domos construendas quam ad pascenda quecumque haberent animalia et aqu[am totam] et ipsius aque justitiam totamque piscationem a vado de Cohotram usque ad pontem de Jallart ita liberam quod in ea sine monachorum lice[ncia nul]lus piscabitur nec in ea aliud quid capiet Quicquid etiam dicti monachi de militum casamentis et de terris ac censibus ac reditibus a quibus[cumque vel] quomodo libet acquisierint nullius obstante contradictione deinceps libere et quiete possidendum eis concesserunt idem Gaucherius et Helyas filius [ejus Et] jam dictus Andreas eis postmodum succedens dedit eidem ecclesie Domus Dei pro anima uxoris sue Holdeardis decem solidos annuatim ad festum sancti [Remigi]i in theloneo ejusdem castr[i redd]endos Et hec omnia que superius dicta sunt reddidit ipse Andreas semper annis singulis sepe dicte Domus Dei ecclesie [Hec autem] universa prefatis Dom[us Dei mon]achis sollempniter collata ne in posterum quod absiti valeant irritari pro salute anime mee sigilli mei [impres]sione confirmo Actum hoc apud Sezanniam anno Domini MCLXXVII testibus hiis Thoma Molismensi abbate priore ejusdem Domus Dei Hugone Andeciarum priore ipso Andrea Feritatis Gaucherii domino Anselmo Trianguli domino Fromundo milite [de] Pla[io]t[ro] Willelmo marescallo meo Petro Bristalt Hugone Planceii domino Petro de Lingonis