Charter Document - 06340555
| Charter Number: | 06340555 |
|---|---|
| Cartulary Title: | Cartulaire de l'abbaye de Molesme ancien diocèse de Langres 916-1250. Recueil de documents sur le Nord de la Bourgogne et le Midi de la Champagne. |
| Charter Language: | Latin |
| Charter Origin: | Religious |
| Charter Type(s): | Foundation |
| Date: | 1212 |
| Date type: | Internal, A.D. |
| Resource Link(s): |
|
Charter:
Albericus Dei gratia Remensis archiepiscopus universis Xpisti fidelibus ad quos littere presentes pervenerint in Domino salutem Noverit universitas vestra quod cum dilecta in Xpisto filia nobilis mulier Malthildis de Villari domum quandam juxta Ecreium de bonis propriis fundaverit in loco qui dicitur de Pratella ipsam domum divino cultui dedicari voluit divinitus inspirata et sanctimonialium collegium ibi poni ita ut essent ecclesie Molismensi subjecte et tam ejusdem loci ordinem quam ecclesie Juliacensis regulam et consuetudines observarent Id etiam nobilis vir Gerardus dominus Ecreii advocatus loci ipsius confirmavit locum cum suis appendiciis quantum pertinebat ad ipsum Molismensi ecclesie liberaliter concedendo Cum igitur cura suscepte sollicitudinis nos invitet pia vota desiderantium promovere in hiis maxime que a rationis tramite non discordant memorate nobilis Mathildis devotis precibus annuentes eidem indulsimus quod tam humiliter implorabat concedentes quantum ad nos pertinet nominatum locum eidem ecclesie Molismensi et factum sicut prescriptum est libere confirmantes Attendentes autem tam paupertatem quam novitatem loci predicti si quam nobis vel successoribus nostris procurationem deberet vel debiturus esset illam pietatis intuitu de assensu et voluntate Remensis ecclesie in perpetuum acquitamus Ad majorem igitur securitatem pariter et cautelam locum cundem divino cultui dedicantes cum hiis que impresentiarum possidet vel in futurum prestante Domino justis modis poterit adipisci confirmamus ecclesie Molismensi et sanctimonialibus in sepe dicto loco Domino servituris Quicumque autem huic nostre confirmationi temere voluerit contraire ipsos sententia anathematis innodamus tamdiu eos eidem sententie subjacere volentes quousque reatum suum emendare curaverint satisfactione condigna Ut autem hec omnia supradicta firma illibataque permaneant presentem paginam tam nostro sigillo quam Remensis ecclesie fecimus roborari Actum anno Domini MCC duodecimo mense junio