Charter Document - 06340431
| Charter Number: | 06340431 |
|---|---|
| Cartulary Title: | Cartulaire de l'abbaye de Molesme ancien diocèse de Langres 916-1250. Recueil de documents sur le Nord de la Bourgogne et le Midi de la Champagne. |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1110 |
| Date type: | Internal, A.D., Calendar |
| Resource Link(s): |
TELMA - Traitement électronique des manuscrits et des archives |
Charter:
In nomine Patris et Filii et Spiritus sancti Amen Quoniam sepe facta priorum vetustate solent aboleri nisi scripto firmentur majorum id auctoritas assuevit ut largitiones que ecclesiis conferuntur litterarum corroborentur apicibus et tam presentium quam posterorum memorie scriptis imprimantur Quapropter ego Philippus Dei gratia Trecensis ecclesie episcopus reverendi confratris nostri Roberti primi Molismensis cenobii abbatis ceterorumque fratrum supplicationibus imploratus impulsus etiam prece comitis Hugonis qui Molismense cenobium precipuo diligebat amore dona et beneficia que vel idem comes vel quilibet alii amore Dei et anime salute ecclesie Sancti Quintini contulerant assensu et voluntate capituli nostri scriptis firmare et sigilli nostri auctoritate munire decrevi Presenti igitur scripto firmamus et corroboramus quecunque predicta Sancti Quintini ecclesia Trecis hactenus adquisivit vel deinceps adquisierit in pratis in vineis in ortis et possessionibus aliis dona etiam comitis Hugonis vel aliorum ut eidem ecclesie firma et illibata permaneant et Deo ibidem servientes quiete et absque inquietatione contradictionis ea possideant Adicimus autem eis ex assensu capituli nostri et predicti comitis instancia ut si in his que adquisierint aliquid fuerit unde decima debeatur cum in manus et possessionem eorum devenerit ab omni decima liberi sint et absoluti Si quis vero amore religionis et salutis sue desiderio infra cimiterium predicti loci se sepeliri expetierit a nullo prohibeatur salvo tamen jure sacerdotali Hec nos eis concedimus et ut rata et inconvulsa permaneant sigillo nostro munimus ea tamen conditione ut memores nostri sint in orationibus suis et cum aliquis canonicorum nostrorum obierit pro eo ab eis servicium fiat et missa celebretur Actum est hoc Trecis publice in capitulo Sancti Petri III kalendas julii anno ab incarnatione Domini millesimo centesimo decimo indictione tercia epacta XXVIII concurrente quinto Ad hoc confirmandum testes subscripti adnotantur Raynaudus prepositus Girardus archidiaconus Drogo archidiaconus Petrus archidiaconus Goscelinus archidiaconus Anselmus archidiaconus Odo precentor Johannes decanus Hugo decanus Johannes capellanus Si qua vero ecclesiastica secularisve persona huic dispositioni nostre contraire voluerit correptus si non resipuerit anathematis eum gladio subicimus et ab ecclesie limine sequestramus donec resipiscat