Charter Document - 06340375

Je Guiz de Vainiorri sires de La Ferté sus Amance faz a savoir a touz ceus qui cest escrit verront que ge ai mis en gages au prior Hervier de Varennes por XL libres d'estevenenz la garde et l'avoorie que ge di que ai a Champigni Et promet par mon serement a bone foi que por l'achoison de cele dite garde ne por autre chose ou droit de la vile ne en l'apendisse ne je ne mi oir ne reclamerons riens jusqu'a tant que ge ou mi oir aurons randu les XL libres devantdites audit prior Et je voil et otroi que se je ne mes commendemenz ne mi oir forfaisiens riens en cele dite vile contre la volenté au prieur que li officiaus de Lengres m'escomenit et mete ma terre en entredit a la requeste le prieur Et li jadiz priors ne puet metre en nule garde ne en nule commandise la jadite vile fors que en sa main Et quant ge aurai rendu au prior les jadites XL libres si aille chaucuns a son droit Et por ce que ceste chose soit estable je ai mis en ces letres mon seel Ce est fet en l'an de grace mil et II et XXXIX el moys de novenbre