Charter Document - 06340173
| Charter Number: | 06340173 |
|---|---|
| Cartulary Title: | Cartulaire de l'abbaye de Molesme ancien diocèse de Langres 916-1250. Recueil de documents sur le Nord de la Bourgogne et le Midi de la Champagne. |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1108 |
| Date type: | Internal, A.D. |
| Resource Link(s): |
|
Charter:
In nomine Patris et Filii et Spiritus sancti Amen Ego Hugo comes Campanie comitis Teobaudi filius notum volo fieri omnibus sancte ecclesie fidelibus presentibus et futuris quod excellentiori usus consilio Hiis ita in Trecensi concilio gestis et post excommunicacionis sentenciam ne in posterum possint infringi sollempniter autenticatis ego ipse cum illustribus viris Hugone Borrello duce Burgundie Willelmo Nivernensi comite dicto comite de Barro Airardo Brinie comite Hugone Rinelli comite Jofredo Calvi Montis domino Rogerio Jovisville domino Pontio Triagnelli domino Molismum adveni pro negotiis meis et eorum tractandis meque et eos Robertus primus loci illius abbas cum monachis suis honorifice excepit Post orationem vero ad magistrum altare accedens astantibus dicto duce et quatuor comitibus et baronibus predictis medietatem Rumiliaci quam michi in vita mea antequam Molismum venissem retinueram et ibi post decessum meum dare disposueram nam aliam medietatem jam integre possidebat ecclesia extracto de proprio digito anulo et donum de tota potestate Rumiliaci super altare ponens eidem ecclesie contradidi jure perpetuo possidendam dictam scilicet potestatem adiciens quod si quis de casamento meo aliquid eidem ecclesie dare voluerit liceat ei ratumque hoc et firmum concedo in perpetuum permanere Id ipsum dicti Nivernensis Barri Brinie Rinelli comites et dicti barones mecum assistentes sicut predicte ecclesie de casamento meo concessisse me viderunt et ipsi exemplo meo compuncti meisque inducti precibus singuli eorum una cum dicto duce eidem ecclesie concesserunt perpetuo possidendum quicquid de eorum casamentis ecclesie illius monachi quolibet modo in posterum sibi acquirerent Testes inde sunt una mecum Walterius vicecomes de Clamiceio Hugo de Tilio Andreas Ramerruci comes dator et concessor ecclesie de casamento suo quod alii Hugo cognomine Brito filius ejus Gaufredus Otranni filius Lebaudus et Grimaudus de Trecis Teobaudus puer filius comitis Stephani fratris mei Adjecit autem huic concessioni sue dictus comes Barri donans eidem ecclesie aquarum suarum piscariam apud villam suam de Verteil Ego quoque Jerosolimam postea tendens Molismum adii orationis gratia ibique omnes homines cum uxoribus eorum et liberis qui de potestate Rumiliaci Trecis morabantur superiori dono addidi concedens salvamentum eorum omnium quorum in potestate Rumiliaci capita sunt ecclesie sepe dicte concedens etiam eidem possidendos eos qui de eadem potestate manent Trecis vel Insulis ne quid ex ea minuatur aut decidat preter Leobaudi uxorem et ejus filios Licet igitur dona hec mea et dictorum principum et etiam dicti ducis Molismensi ecclesie non uno sint eodemque tempore collata volui tamen universa in hac pagina congeri et ut inconvulsa deinceps permaneant sigilli mei impressione cum testibus subscriptis plenius confirmari Si quid vero de donis patris mei et fratrum meorum et meis minus hic scriptum fuerit quam jus poposcisset non ideo que memorialiter scribi non potuerunt et tamen dudum a me ipso et ab eis data sunt ecclesie a confirmatione ista removeo sed sicut scripta ita inscripta que hactenus tenuit eadem ecclesia omnimodis fixa permanere decerno Actum est hoc et confirmatum apud Castellionem super Sequanam anno ab incarnatione Domini MCVIII testibus hiis Willelmo Nivernensi Airardo Brinie Milone de Barro Hugone de Rinello comitibus Guidone Gannelruci Rogerio Jovisville Haimone de Falconees Jofredo de Calvo Monte Bertranno Sine Terra Jofredo Furnerio Hilduino de Marrolis Pontio de Triagnello Ad hec ego comes Teobaudus dicti Hugonis avunculi mei vestigiis pie inherens cum Jerosolimam devotus tenderet rogatu ejus sigillo meo confirmavi ecclesie Molismensi perpetuo possidendum quicquid ei ipse confirmaverat et insuper quicquid de casamento meo ipsa ecclesia quolibet modo acquisierit sibi gratanter concedens corroboravi testibus hiis Milone comite de Barro Guidone Wangionisrivi domino Andrea de Baudimento Rocelino de Vendopera Milone de Diunvilla Pontio de castello Chapis Gaufredo de Trecis Otranno filio ejus Lebaudus et Grimaudus burgenses mei de Trecis