Charter Document - 06340127

Ego Theobaldus Campanie et Brye comes Palatinus notum facio universis tam presentibus quam futuris quod viri religiosi I abbas Molismensis ecclesie et ejusdem loci conventus in tota justicia sua quam habent in hominibus et feminis in bosco et plano pascuis et aquis apud Essoyam apud Warpillerias et apud Poligneium et in remanantiam quam habent in dictis villis me et heredes meos Campanie comites in perpetuum associant et iterum medietatem emendarum et escheetarum tantummodo mobilium hominum et feminarum que habent ad prefatas villas et apud Servigneium michi et heredibus meis concedunt jure perpetuo possidendum Similiter et medietatem abbonamentorum et talliarum que tallie fient et recipientur in domibus ipsorum apud Essoyam et apud Pollinneium tam de mandato ipsorum quam de mandato meo et heredum meorum equaliter dividentur Similiter et abbonamenta recipientur et omnia alia ad dictas villas pertinentia que habent fieri vel dividi inter ipsos et me vel heredes meos tam de mandato ipsorum quam de mandato meo vel heredum meorum equaliter dividentur tali conditione quod in dictis locis hominibus et feminis medietas justicie et abbonamentorum talliarum mea vel heredum meorum erit et altera medietas in perpetuum abbatis et conventus predictorum Si vero aliquis hominum sive feminarum dictorum locorum ad dictos monachos pertinentium sine corporis sui herede decesserit tota hereditas ipsorum erit tali modo quod hereditas que de ipsorum ecclesia movebit erit in libera voluntate nostra et eam si voluerint retinebunt vel vendent in qua hereditate sive in venditione ipsius hereditatis ego nichil potero capere nec habere illa vero hereditas que de ipsis non movebit infra annum et diem oportebit quod de manu eorum extrahatur et extra manum ipsorum ponatur et tradatur hominibus qui sunt vel erunt de assotiatione predicta et si in ponendo extra manum eorum hereditatem illam que de ipsis non movebit aliquid habuerint ego similiter inde nichil percipiam nec habebo Mobilia vero si qua fuerint legatis et debitis primo persolutis inter ipsos et me vel heredes meos per medium dividentur In reditibus sive proventibus feodis et rebus aliis que in dictis villis et in finagiis earumdem habent et in gageriis quas tenent apud Verpillerias a Joberto Guidone et Jeremia militibus ego aut heredes mei nichil capere poterimus vel vendicare sed ipsi omnia supradicta sine me et heredibus meis integraliter capient et habebunt Omnia vero bona ipsorum ad dicta loca pertinentia ego et heredes mei tanquam nostra propria tenemur garantire bona fide ita quod omnia ipsis omnimode salva erunt similiter bona fide Si autem contigerit quod homines ipsorum sive femine eorum de Molismo sive de alia terra ipsorum ad dictas villas per maritagium sive alio modo venerint moraturi de societate supradicta erunt Similiter si homines sive femine de villis supradictis apud Molismum sive ad aliam terram dictorum monachorum per maritagium vel alio modo venerint moraturi sine reclamatione mea vel heredum meorum libere et integre erunt ecclesie memorate Quod si homines mei aut femine mee vel heredum meorum ad dictas villas venerint moraturi inter me vel heredes meos et dictos manachos communes erunt Ego vero aut heredes mei nullum hominem sive feminam dictorum monachorum de villis predictis in terra nostra poterimus retinere nec defendere contra ecclesiam Molismensem Et sciendum quod quotiens apud Molismum abbas constituetur novus homines et femine predictorum locorum fidelitatem facient novo abbati constituto similiter facient comiti Campanie qui novus veniet ad regimen comitatus Trecensis Prepositus vero de communi assensu tam dictorum monachorum quam meo vel heredum meorum pro dicta societate servanda in dictis villis statuetur et faciet juramentum fidelitatis dictis monachis et michi vel heredibus meis antequam de prepositura se intromittat et si intromitteret sexaginta solidos emendaret que emenda per medium dividetur Si prepositura venditur de communi assensu vendetur et precium venditionis inter me et heredes meos et dictos monachos equaliter dividetur prepositus vero de medietate dicte venditionis antequam de prepositura se aliquotiens intromittat bonos plegios dabit monachis memoratis Si autem prepositura non vendatur prepositus omnium acquisitorum donorum extorsionum sive exactionum de quocumque loco veniant vel quocumque modo fiant per juramentum suum reddet dictis monachis medietatem Evoluto autem anno dictarum villarum prepositus vel ex toto mutabitur vel de novo restituetur qui si restituetur juramentum suum nobis faciet tanquam novus Si vero abbas et monachi rogatam fecerint in dictis hominibus sicut solet fieri inter ipsos et me vel heredes meos erit commune quicquid acceperint ab eisdem Similiter in omnibus modis et commodis que ego aut heredes mei a prefatis hominibus prece minis vel gratia seu alio quolibet modo extorserimus vel habuerimus dicti monachi capient similiter medietatem Preterea sciendum est quod homines dictarum villarum ego aut heredes mei nunquam pro aliqua necessitate neque pro exercitu aliquo ultra unam dietam ducere poterimus ita quod die sequenti ad hospitia sua redire valeant competenter qui autem ad submonitionem meam aut heredum meorum comitum Campanie ire contempserit quinque solidos pruviniensium reddet pro emenda quorum medietas nostra erit que vero sub monitio quotienscumque facta fuerit per priorem Granceii super Ursam fiet Preterea sciendum est quod si ego aut heredes mei in sepe dictis villis et in justicia ipsarum villarum aliquid acquisierimus bona fide medietatem acquisitorum habebunt monachi prius ab ipsis medietate probatorum sumptuum persoluta Ego etiam aut heredes mei in jam dictis villis et in earum justicia nichil novum facere poterimus neque statuere sine consensu et voluntate abbatis et conventus predictorum neque destituere constitutum Gistum etiam capere non poterimus in memoratis villis et insuper in predictis nemoribus monachorum planis pascuis pratis aquis que ipsorum sunt propria custodes sive forestarii de communi assensu eorum et meo vel heredum meorum statuentur et quam cito statuentur facient juramentum fidelitatis ipsis monachis et michi Fore facta que inde evenerint prius nobis facta fidelitate per medium inter nos dividentur In nemoribus vero de Osilimonte in quibus dicti monachi habent duas partes et ego duodecimam concesserunt michi et ego eis quod totum scilicet pars ipsorum et pars mea eat per medium et de communi assensu ipsorum et ipsius ibidem forestarii ponentur per juramentum suum unicuique partem suam fideliter et integre reddituri ita tamen quod de eisdem nemoribus capient monachi quicquid ipsis necesse fuerit ad usum Molismi Polinneii Granceii Essoye et Verpilleriarum tam in grosso quam in gracili jacente et stante sicco et viridi a pede usque ad cimam Si vero nemora de Essoya posita fuerint in foresta cum vendita fuerint medietas precii portionis nemorum ad monachos pertinentium mea erit et altera medietas ecclesie Molismensis hoc excepto quod monachi omnimodum usuarium sibi retinent ad loca prefata scilicet Granceium Poligneium Essoyam Verpillerias et Molismum et predicto modo in eisdem nemoribus forestarii ponentur De dictis vero nemoribus universis ego neque heredes mei alicui conferre poterimus sine consensu abbatis et conventus predictorum et ipsi similiter de eisdem nemoribus alicui conferre non poterunt sine assensu meo Hanc autem societatem fecerunt abbas et conventus predicti salvis sibi usuariis suis et salvis corveiis suis que habent tam in dictis villis quam in finagiis earumdem Sciendum est igitur quod neque pro pace aliqua neque pro casu aliquo ego vel heredes mei societatem istam in alia manu ponere neque dare neque commendare poterimus quam in manu nostra sed quicumque comes erit civitatis Trecensis dictam societatem in manu sua propria retinebit qui etiam comes et ejus successores militem unum in animas suas jurare facient quod hec omnia bona fide tenebunt et firmiter observabunt requisiti ab abbate Molismensi nec in aliquibus reditibus et proventibus dictarum villarum aliquid percipient donec dictum prestiterint juramentum Ut autem hec omnia rata et inconcussa permaneant et in perpetuum inviolabiliter observentur litteris annotata sigilli mei feci munimine roborari Actum anno gratie millesimo ducentesimo tricesimo tertio mense martio