Charter Document - 06340076

Ego Philippus Planceii dominus et Agnes uxor mea notum facimus universis presentes litteras inspecturis quod de querelis quas habebamus ad invicem inter nos ex una parte et abbatem et conventum Molismensem ex altera videlicet de constructione stagni et molendinorum juxta stagnum prope Villam Dei necnon de omnibus pertinentibus ad idem stagnum compromisimus in virum venerabilem Henricum cantorem Trecensem et virum nobilem Clarembaudum dominum Caparum qui dictas querelas inter nos ad concordiam revocaverunt in hunc modum videlicet quod ab introitu extacheure molendinorum usque ad extacheuram molendinorum ecclesia Molismensis habeat dominium in aqua tale videlicet quod in omnibus proventibus molendinorum tam in omni montura quam farina et justicia et in omnibus piscibus que devenient ad instrumenta piscatoria molendinorum vel capientur infra dictam extacheuram ecclesia Molismensis omnibus modis et commodis medietatem habebit et ego dictus Philippus et heres meus aliam medietatem habebimus Aqua etiam stagni luulabitur Sciendum quod molendinarii ponentur in prefatis molendinis et amovebuntur ab eisdem de communi consensu ecclesie Molismensis et mei dicti Philippi et heredum meorum directe sibi in jure quod habent in dictis molendinis succedentium nec ibi poterunt poni vel amoveri molendinarii sine assensu utrorumque Preterea molendinarii qui ibi ponentur fidelitatem facient per juramentum suum ecclesie Molismensi et michi dicto Philippo quod utrique jus suum superius expressum conservabunt Quod si contigerit abbatem et conventum Molismensem vel me dictum Philippum vel heredem meum conqueri de aliquo molendinario dictorum molendinorum conquerens dicet per veritatem suam quod ex justa causa exigit eum amoveri nec alter contradicere poterit et idem de communi assensu amovebitur et alius vel alii si omnes molendinarii ex justa causa habeantur suspecti ponentur de communi consensu loco amotorum Et si dicta molendina quocumque modo destruantur in eis reficiendis et in reparatione molarum et aliorum necessariorum ecclesia Molismensis ponet medietatem sumptuum et ego jam dictus Philippus et heredes mei aliam medietatem et si aliqua parcium nollet ponere sumptus competentes in refectione eorumdem molendinorum integre percipiet quousque eidem plene satisfactum esset de portione costamentorum que alteram partem contingeret Et si per aquarum inundationem chauceia stagni vel in parte vel in toto destruatur communibus sumptibus utriusque partis reficeretur Si vero per gueiram dicti mei Philippi et heredum meorum dictam chauceiam destrui contigerit vel quando ego jam dictus Philippus vel heredes mei pisces dicti stagni vendiderimus sumptibus propriis eamdem chauceiam reficere tenebimur Et si contigerit me dictum Philippum vel heredes meos in chauceia dicti stagni facere essaut ecclesia Molismensis ponet medietatem piscium qui ibi capientur et ego dictus Philippus et heredes mei similiter ita tamen quod non poterimus aliquid facere per quod impediatur piscium accessus ad dictum essaut vel ad beeyes dictorum molendinorum vel ad instrumenta ibi posita ad pisces capiendos ad unam teysiam desuper chauceiam ante molendina Sciendum etiam quod si in aliqua parte chauceie stagni ego jam dictus Philippus vel heres meus molendinum vel batorium vel qualecumque edificium fecero ponendo medietatem sumptuum ecclesia Molismensis medietatem proventuum percipiet et habebit in eisdem edificiis jus consimile juri molendinorum supradictorum in quibus ecclesia Molismensis in omnibus modis et commodis medietatem percipiet et habebit Et in redemptione latronis si latro ibi capiatur et a me vel herede meo redimiatur ecclesia medietatem habebit Et si dicta molendina admodiata non fuerint ego jam dictus Philippus vel heres meus et ecclesia Molismensis duas claves in arche dictorum molendinorum habebimus ita quod uterque suam habebit et servabit Actum anno gratie MCCXXVIII