Charter Document - 06331199
| Charter Number: | 06331199 |
|---|---|
| Cartulary Title: | Cartulaire de l'abbaye de Molesme ancien diocèse de Langres 916-1250. Recueil de documents sur le Nord de la Bourgogne et le Midi de la Champagne. |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1114 |
| Date type: | Internal, A.D. |
| Resource Link(s): |
|
Charter:
In nomine Patris et Filii et Spiritus Sancti Amen Quoniam volubilium temporum mutabilitas rerum mutabilitatem et oblivionem confert et parturit quicquid in memoriam volumus permanere litterarum testimonio debemus perhennare Sciant igitur moderni cum posteris quod domnus Guido Molismensis ecclesie venerabilis abbas et domnus Robertus prior de Peiaco cum pluribus aliis religiosis honestisque personis me Willelmum Cathalaunensis ecclesie immeritum pontificem sub optentu pietatis adierunt expetentes et deprecantes quatinus ecclesias quas in nostro episcopatu de manu laicali per manum nostram acceperant eisdem meo firmarem privilegio et quicquid ulterius in eisdem ecclesiis cujuslibet persone per manum Cathalaunensis episcopi monachis Molismensibus traderet devotio Ego igitur Willelmus Dei gratia Cathalaunensis episcopus eorum peticioni annuens per hujus privilegii mei cartulam ad laudem et concessionem archidiaconorum canonicorumque nostrorum firmo eis et ecclesie Molismensi que superius expecierunt Scilicet ecclesiam de Baya cum tota magna decima exceptis tribus modiis annone qui ad sacerdotem pertinent de Baya scilicet modium frumenti modium siliginis et modium avene et duas partes tocius minute decime et feni et in Purificatione beate Marie omnes candelas siquidem prior de Peyaco vel monachus ex parte sua in ecclesia de Baya in festo sancti Petri missam celebrare tenetur Et ecclesiam de Onya cum duabus partibus magne decime et minute et duas partes turtellorum de Natali et de Pascha Capellam quoque que est ad fontem de Lusineio Item in villa que Fera Campestris appellatur ecclesiam unam cum capella Aquatici eidem ecclesie appendicia Quecumque siquidem catholica persona in atriis ecclesiarum in quibus monachi manent se sepeliri pecierit non ei prohibeatur salvo tamen jure sacerdotis et ecclesie parrochialis Sacerdotes ydoneos in ecclesiis prelibatis abbas Molismensis sive priores eligant et ad suscipiendam curam animarum episcopo presentent Hec umquam omnia trado ecclesie Molismensi firma et illibata Si quis autem huic privilegio contradicere voluerit secundo terciove commonitus nisi satisfactione congrua emendaverit Spiritus sancti gladio feriatur et a liminibus sancte ecclesie sequestretur Actum est hoc Cathalauni et confirmatum in ecclesia Beati Stephani anno ab incarnatione Domini MCXIIII indictione VII Ecce persone subscribuntur quarum testimonio carta hec roboratur scilicet Herberti archidiaconi S Odonis S alterius Odonis S tercii Odonis archidiaconorum S Rogerii tesaurarii S Garnerii cantoris S Petri S Henrici presbiterorum regnante in Gallia venerabili Francorum rege Ludovico domno Willelmo Cathalaunense episcopo Reinaldus cancellarius scripsit et subscripsit