Charter Document - 06331005

In nomine sancte et individue Trinitatis Patris et Filii et Spiritus sancti Amen Quoniam prisce consuetudinis approbabilis usus ab antecessorum nostrorum industria ductus juxta Romane auctoritatis exempla ea que posterorum memorie reservanda censentur litterali tradi custodie utilitatis et honestatis gratia commendat mentis humane labilem et mutabilem naturam considerantes dignum duximus ea que subinferuntur ne oblita corruant ne vel quod nostris temporibus actum est quandoque aliqua mutetur fraudulentia in hujus carte sinu fideliter recondere Ego igitur Robertus Dei gratia Lingonensis ecclesie episcopus dum in matris basilice gremio nobis a Deo concesse degeremus et secundum fidei doctrinam una cum fidelibus prefate ecclesie de statu et profectu illius unanimiter tractaremus venit ad nos domnus Robertus Molismensis abbas vir religiosus per intercessionem et preces tocius congregationis Lingonensis ecclesie precibus quoque ac consilio domni Almarici ejusdem ecclesie decani sed et domni Lamberti thesaurarii et domni Goscelini et Hugonis Cabillonensis et Geraldi atque Warnerii archidiaconorum benignitatem nostram humiliter expostulans quatinus ecclesiam Beati Desiderii Lingonensis episcopi que in eadem urbe sita est ad ecclesiam Sancti Mammetis pertinentem Sancte Marie Molismensis ecclesie per instrumenta apicum concedere et misericorditer largiri non dedignaremur Quorum juste et racionabili petitioni libenter adquiescentes communi consilio et assensu tocius capituli quod pie postulabant recto ordine ad effectum perducere curavimus Damus igitur et concedimus Sancte Marie Molismensi supramemoratam Sancti Desiderii ecclesiam et ejusdem martiris corpus quod in eadem sepultum est cum ecclesie appendiciis possessionibus scilicet oblationibus consuetudinibus pratis terris cultis et incultis sicut canonici possederant exceptis militaribus casamentis salvo tamen jure episcopali aditientes quatinus ad honorem et reverenciam beatissimi martiris et egregii pontificis signum pro defunctis in eadem pulsetur corpora defunctorum primitus presententur et quicquid de parrochianis Sancti Mammetis sive archidiaconus fuerit sive canonicus vel clericus aut quicumque laicus in cimiterio antedicte Sancti Desiderii ecclesie sepulture se tradere voluerit absque omni calumpnia sepeliatur quod si defunctorum amici annuas oblationes vel tricenarios ibi facere voluerint absque contradictione et reclamatione parrochiani Sancti Mammetis faciant hec enim antique consuetudinis extitisse et ad nostra usque tempora perdurasse indubitanter dinoscuntur Donamus etiam eidem ecclesie Molismensi ecclesiam de Monceon cum appendiciis suis et minutis decimis et medietate decimarum grossarum et de hac medietate habeat ecclesie sacerdos modium unum annone ad mensuram ejusdem ville dimidium frumenti et dimidium avene et quicquid datur sacerdoti pro elemosina vel offertur medietatem habeat sacerdos et alteram medietatem habeant monachi de refectionibus vero si redemptio facta fuerit jam dicti monachi medietatem accipient et de tricenariis similiter hec itaque ecclesia libera erit ab omnibus consuetudinibus paredis tabulis et crucibus excepto quod si decanus ad synodum venerit apud Lingonas dabitur ei a monachis quartellus avene et fenum ad pastum duorum equorum ac stallus candele si vero defuerit nichil ei redditur Ecclesiam de Richeborc cum appendiciis suis in qua sacerdos medietatem oblationum elemosinarum ac decimarum omnium percipiet reliquam vero medietatem monachi habebunt Ecclesiam de Hispilent cum appendiciis suis et decimis Ecclesiam de Summostir cum appendiciis suis et medietate minutarum decimarum et oblationum atque elemosinarum Ecclesiam de Visigniis cum appendiciis suis et duabus partibus decimarum omnium ac medietate oblationum atque elemosinarum Concedimus etiam priori Sancti Desiderii ut in supradictis ecclesiis liberam presbiterorum electionem habeat Hoc etiam a nobis confirmatum est ut nullus abbas Molismensis ecclesie vel priori Sancti Desiderii hec immutare vel minuere vel censui dimittere vel aliquam possessionem ab ecclesia alienare valeat nisi ex consensu domni Lingonensis episcopi et capituli Sancti Mammetis Actum est hoc in capitulo Sancti Mammetis publice subscriptis testibus laudantibus hec atque concedentibus Quicumque huic testamento nostro ausu temerario contradicere voluerit divine vltionis vindictam sentiat et a participatione sacrosancti corporis et sanguinis domini nostri Jhesu Xpisti segregatus perpetuo anathemate feriatur donec ad emendationem venerit Signum Roberti episcopi S Almarici decani S Lamberti erarii S Goscelini archidiaconi S Gerardi archidiaconi S Hugonis archidiaconi S Warnerii archidiaconi S Theoderici cappellani episcopi S Duranni presbiteri S Herberti presbiteri S Humberti diaconi S Petri diaconi S Constancii diaconi S Rodulphi subdiaconi S Almarici subdiaconi S Constantini subdiaconi Actum est hoc anno ab incarnatione Domini MCI