Charter Document - 06330268
| Charter Number: | 06330268 |
|---|---|
| Cartulary Title: | Cartulaire de l'abbaye de Molesme ancien diocèse de Langres 916-1250. Recueil de documents sur le Nord de la Bourgogne et le Midi de la Champagne. |
| Charter Language: | Latin |
| Charter Origin: | Lay |
| Charter Type(s): | Concession |
| Date: | 1140 - 1148 |
| Date type: | Assigned |
| Resource Link(s): |
|
Charter:
Presencium et successorum memorie presentis scripti cyrographo commendamus qua racione a Walanno porcionem quam in molendinis nostris qui Beate Marie dicuntur obtinebat habuerimus Contigit namque fratrem nostrum Petrum de Monte Regali tunc temporis prepositum fratre Gosberto de Mosa presente et adjuvante certis ex causis hunc impeciisse Walannum Qui Deum non timens hominem non veritus in eundem Gosbertum impetu facto quod utique porcio sacrilegii est monachum gladio percussit Postmodum autem satis devote penitens et quomodo vel qualiter in graciam redire posset omnimodis elaborans partem quam in prefatis molendinis ut dictum est obtinebat tum pro reatus sui satisfactione tum pro anime salute nobis contulit Sed et venerabilis pater noster Girardus caritatis non oblitus eidem Walanno libras quatuor et dimidiam domum quam ejusdem mater nobis contulerat vice digne retributionis donavit concessit etiam hac de causa ut quicquid Guiardus de Leesma cujus filiam ancillam nostram sibi in matrimonium adsumpserat ei de suis possessionibus deinceps largiretur vel jam largitus fuerat quoad viveret libere ac quiete teneret tali siquidem pacto ut post ejusdem Walanni decessum filiis suis de ancilla nostra habitis ad partem nostram attinentibus ea nimirum que ex predicti Guiardi munere erat videlicet cum dimidia domo quam sicut premisimus ipsius Walanni mater nobis in elemosinam dederat remaneret hereditas Hoc autem in communi capitulo sub fidelium testium astipulatione fideliter firmiterque sanctitum est Ex parte domni abbatis testes fuerunt idonei Hugo major Garinus ejus filius Hulricus nepos suus ex parte Walanni Johannes ejus frater Olivarius miles de Lesinis Johannes de Rocha Verum ipse Walannus prout fieri solet ad hujus doni confirmationem librum de manu sua super altare posuit