Charter Document - 06330086
| Charter Number: | 06330086 |
|---|---|
| Cartulary Title: | Cartulaire de l'abbaye de Molesme ancien diocèse de Langres 916-1250. Recueil de documents sur le Nord de la Bourgogne et le Midi de la Champagne. |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1090 - 1111 |
| Date type: | Assigned |
| Resource Link(s): |
|
Charter:
Quoniam experimento didicimus plurima a catholicis viris sancte ecclesie collata incuria scribere nolentium oblivione quadam a memoria recidisse et eorum quorum usibus prodesse poterant aut parum aut nichil omnino profuisse necessarium duximus omnium fidelium tam presentium quam futurorum noticie scribere quod quidam strenuissimus miles Olricus nomine Barrensis castri vicecomes et uxor ejus Lecelina dimidiam partem terre quam Sancti Leodegarii dicunt que etiam illi Leciline jure hereditario a parentibus contingebat Sancte Molismensi ecclesie pro filii sui Widonis et animarum suarum omniumque predecessorum suorum requie et remedio tradiderint atque eam ut eatenus liberaliter tenuerant et possederant ecclesie perpetuo tenendam et perpetuo possidendam reliquerint tali videlicet condicione ut si predicta Lecilina ad ecclesiam venire et more sanctimonalium vivere decreverit sicuti alie ita et ipsa deinceps necessaria vite accipiat et pro peccatis suis jam curis secularibus expedita Dominum intercedat Quod si aliter placuerit et hoc minime facere voluerit post obitum fratres ei obsequium debitum impendant et inter familiares orando et deprecando consocient Quicquid igitur in supradicta terra tenuerant et sicut possiderant in ecclesiis in servis et ancillis in pratis et silvis et arabilibus terris in plurimis etiam locis villarum sive silvarum nomine distinctis videlicet Noviento et Fosiolo Nicio et Lingio partem etiam illam quam Giraudus de Rubro Monte in vadimonio propter octo libras denariorum possidet ita duntaxat ut ecclesie fratres memoratam pecuniam ei restituant vel in quocumque loco seu immineat seu subjaceat excepto quodam nomine Dodone ita Sancte Molismensi ecclesie concesserunt ut nichil omnino sibi nec alicui suorum ex illa retinerent sed liberam omnino in pauperum Xpisti conferrent expensa assencientibus et approbantibus hoc idem filiis eorum Ricardo et Adam filiabus vero Margarita et Luca Hanc donationem et hanc conventionem prius et apud castrum Barrum pretaxatam et postea in ecclesia Sancte Marie recitatam et confirmatam testificantur Milo Barrensis comes Bartolomeus Rotbertus de Riciaco Raingerius Ansellus et Wido frater ejus Ricardus filius Aganonis Walterius de Avaluria et Milo filius ejus Walterius filius Hilgodi