Charter Document - 06330020
| Charter Number: | 06330020 |
|---|---|
| Cartulary Title: | Cartulaire de l'abbaye de Molesme ancien diocèse de Langres 916-1250. Recueil de documents sur le Nord de la Bourgogne et le Midi de la Champagne. |
| Charter Language: | Latin |
| Charter Origin: | Lay |
| Charter Type(s): | Notification |
| Date: | 1102 |
| Date type: | Internal, A.D., Episcopal |
| Resource Link(s): |
|
Charter:
Majorum auctoritas ac rationis ordo suadet ut si quid humana sollertia firmum fore ratumque disponit ut in tempora prorogari valeat officio litterali memorie commendetur Post presentium igitur noticiam future posteritati intimatum curavimus quod Hugo comes et venerabilis uxor ejus Constantia Philippi regis Francorum filia cui idem prefatus rex pater suus Atiniacum villam dederat capellam Sancte Walbulgis pro suarum remedio animarum Sancte Marie de Molismo et ditioni monachorum ejusdem loci contradiderunt et quicquid ad eandem capellam attinet lege testamentali concesserunt Verum quia cardinales clerici inibi canonicas obtinebant supradictis monachis quod juris erat alterius sibi vendicare pertimescentibus hoc actum est industria comitis et comitisse ut in manum domni Manasse archiepiscopi clerici illi canonicas suas deponerent et ab his sese omnino emanciparent Memoratus itaque comes et uxor ejus in presentia ejusdem archiepiscopi sepenominatis fratribus predictam capellam cum omnibus ad eam pertinentibus archiepiscopo laudante et annuente contulit et perpetuo tenendam concessit Quicquid autem tam in dono comitis quam in assensu archiepiscopi actum est predicti regis atque Ludovici filii ejus favore constat esse firmatum ac perpetua sanctione munitum Ne quis autem improbus contra hanc manumissionis paginam aliquando oblatrare valeat signis eam ac probabilium personarum testimoniis corroboravimus Signum Manasse archiepiscopi S Gervasii archidiaconi S Manasse archidiaconi S Rodulfi prepositi S Joffridi decani S Richerii cantoris S Elberti Odalrici Lamberti presbiterorum S Fulchonis Rainoldi Gerardi diaconorum S Isenbardi Bartholomei Milonis subdiaconorum Signum Ludovici filii regis Signum Hugonis comitis Signum Constantie uxoris ejus Actum Remis anno incarnati Verbi millesimo CII indictione X archiepiscopatus domni Manasse anno VII Fulcradus cancellarius scripsit et subscripsit