Charter Document - 06321030

In nomine sancte et individue Trinitatis Patris et Filii et Spiritus sancti ad cujus titulum specialiter pertinet locus Marciniacensis angelicarum sororum conversatione mirifica insignis et mulierum virili continentia et agonis monastici constantia illustris notum sit tam posteris quam modernis qualiter ego Regina ex prosapia non obscura secundum carnem procreata sed meritorum generositate nulla comitis videlicet Cononis filia qui frater extitit Conraldi viri clarissimi in itinere Jerosolimitano defuncti generi nimirum comitis Pictaviensis cum videam lenocinia presentis vite ad hoc unumquemque substernere et infelici modo meretricandi prostituere ut anima ad eternitatem condita demergatur in tartara ibique luat infinita supplicia pro mortis omnino devoluta ruere ad Cluniacensis monasterii cunctis patens azilum eligo applicandum ut quoniam Omnipotens me maritalis jugi sarcina exoneravit et ad hoc me idoneam reddidit par fore ac dignum censeo ut sic ejus gratie respondere debeam quatenus ad ejus suave jugum in Marciniacensi claustro ferendum me cum omni humilitate devoveam et pro ejus amore qui pro me utero virginali non dedignatus est claudi ut de carcere me educeret originalis peccati illuc viva quodam modo sepelienda intream unde usque ad diem vocationis ultime non exeam Forte propitius Deus tali meo placabitur holocausta et pro angustia claustri propter quam relinquo latitudinem totius mundi et juvenili etate non tantum frene castitatis impono sed et spatium vagandi funditus subtraho recompensabit mihi si persevero sicut ipso confortante spero qui sanat contritos et erigit elisos amplitudinem celestis glorie Sed quia lex vetus quam superare jubemur si filii Christiane novitatis esse volumus precipit ut vacui non appareamus quando nos ante conspectum Dei nostri presentamus sed offeramus munus aut facultatis si adest aut bone voluntatis si deest in quo possit illa manifestari et visibiliter exhiberi quamvis sit pauxillum tamen ad ipsum tantillum quod contingit ex parte matris mee maritationis sorte offerendum credo in illa domo in qua habitare eique militare dispono sub regimine Cluniacensis disciplina Dono igitur liberaliter ac solemniter Deo omnipotenti trino et uni cujus nomine dedicatus locus ipse consistit ad titulum pertinens beatissimi apostolorum principis in cenobio Marciniacensi predium mihi competens jure matrimonii ex parte videlicet matris quod in sylva Ardenna territorio Leodiensi constitum in duo loca dividitur quorum alterum Aqualis alterum Rachans dicitur qua nimirum pace et integritate nulla calumnia oblatrante illud possidebam cum eadem in jus predicti monasterii ancillarum totum transfundens atque transcribens quatenus cum omnibus appendiciis suis terris sylvis aquis pratis molendinis piscariis mansis cunctisque redditibus sive porcorum sive arietum sive agnorum lini quoque et lane cere et pecunie postremo cum universis consuetudinibus suis sive dictis sive subauditis serviat uterque burgus Marciniacensi cenobio Quod donum si quis alique modo scienter violare presumpserit nisi ablate rei summam infra quatuordecim dies reddere festinaverit eum ea remissione quam invenire potuerit apud eum qui procurator hujus possessionis ex parte dominarum Marciniacensium fuerit in arbitrio sit omnipotentis Dei quali illum animadversione plectat in futuro ceterum in presenti ne impune ferat in potestatis regie aut episcopalis judicio consistat ut quam voluerit et ille valuerit pensionem tollat dummodo ceteros illius exemplo corripiat Facta est hec carta in presentia probabilium testium et venerabilium personarum et domni Hugonis abbatis qui predicti loci fundator extitit anno incarnacionis Domini millesimo octogesimo octavo indictione undecima regnante in pace solo Jesu Christo Domino nostro