Charter Document - 06320304

In nomine Sancte et individue Trinitatis Patris et Filii et Spiritus Sancti Amen Ego Sancia nobilissimi comitis Raymundi et generose Hurrace regine filia et victoriosissimi regis Adefonsi germana perpensans et animo pertractans quod natura humana a Paradisi gaudiis peccato exigente propulsa rerum statu semper in deteriora vergente secundum illud Sapientis Breves dies cepit habere et homo natus de muliere brevi cepit vivere tempore perpendens etiam quod Qui parce seminat parce et metet et qui seminat in benedictionibus de benedictionibus et metet decrevi ex bonis mihi a Deo creatore meo concessis aliquid ipsius conferre amicis et de mammona iniquitatis amicos adquirere veritatis ut cum defecero in eterna tabernacula recipiar ab ipsis Est itaque venerabile cenobium in partibus Burgundie in territorio castri antiquitus Sinemuro nuncupati prope alveum Ligeris in episcopatu Augustodunensi situm quod Marciniacus dicitur sub jure religiose ac famosissime Cluniacensis ecclesie in qua tanta floret ancillarum Christi religio ut ipse Deus earum sepissime videatur favere desiderio His ergo Christi ancillis et ceteris in eodem Marciniacensi monasterio usque in seculi finem subsecuturis ego Sancia prenominata do et concedo ecclesiam sancti Michelis que est extra murum civitatis Zamorensis sita in partibus Orientis pro remedio anime mee ac parentum meorum concedente glorioso rege Adefonso germano meo cum omnibus hereditatibus que ad eam antiquitus pertinere noscuntur sicut fuerunt temporibus Adefonsi regis avunculi mei et predecessoris ejus scilicet casas terras ruptas et inruptas vineas hortos azenias piscarias bononarias prata pascua paludes petras mobiles et immobiles aquas cursiles et incursiles ligna fructifera et infructuosa exitus montium et regressus et insuper tendas quas habet in Zamora Insuper do eis Galego Raneras Quintanela cum omnibus hereditatibus et terminis suis et locis antiquis sicut mei hactenus et antecessorum meorum fuerunt juris quartam etiam canalis partem de Tavara ad opus monachorum eidem prefate ecclesie deservientium Contestor itaque omnem hominem per nomen tremendi Judicis et per judicium venturum ut nullus hoc factum meum audeat infringere immutare in opus proprium sive alienum aliquid ex hoc dato vindicare violenter auferre aut quocumque modo pervertere Quod si quis temerarie presumpserit cum Juda traditore excommunicatus eterno pereat incendio et cum Datan et Abiron damnatus precipitetur in inferno Amen Amen Ego Infantissa Sancia supranominata que hanc cartam fieri precepi manu mea roboravi Facta carta testamenti decimo tertio calendas januarii era millesima centesima sexagesima nona regnante rege Adefonso in Legione et Tholeto mandante Zamora comite Rodrigo sub manu ejus vicario domno Fernandiz in sede sancti Salvatoris presidente venerabili episcopo domno Bernardo sub manu ejus archidiacono domno Willelmo Ego [rex] Adefonsus hanc cartam roboravi et confirmavi Bernardus episcopus Zamorensis confirmavit Didacus episcopus Compostellanus confirmavit Petrus Lupez confirmavit Roman Cidiz confirmavit Willelmus abbas confirmavit