Charter Document - 06310202

Ego Guichardus Dei gratia lugdunensis archiepiscopus apostolice Sedis legatus universis fidelibus in perpetuum Notum fieri volumus presentibus et futuris quod Philippus abbas sancti Benigni divionensis et monachorum ecclesie sue conventus concesserunt ecclesie cisterciensi domum que dicitur Ducisse et vineam et pratum cum tota adjacenti possessione sicut dux Hugo et ducissa Matildis tenuerant de ecclesia sancti Benigni et tam idem dux et ducissa quam filius eorum Oddo Cistercii ecclesie salvo jure ecclesie sancti Benigni donaverant sine cujus assensu nulla alia ecclesia illam possessionem poterat optinere Itaque per manum nostram et venerabilium fratrum et coepiscoporum nostrorum Gauterii lingonensis et Petri cabilonensis abbas Philippus et ecclesia sancti Benigni totam illam possessionem ecclesie cisterciensi concesserunt liberam et quietam ab omni prestatione decimarum vel alterius consuetudinis aut pensionis sub annuo censu tamen XL solidorum divionensium monete solvendo in mense martio sine occasione aliqua ea die qua voluerint fratres cistercienses Quod si infra mensem illum census solutus non fuerit licebit ecclesie sancti Benigni et pignus tollere sicut de aliis censualibus terris fieri solet et censum suum si voluerit cum legitima emendatione exigere Eo quoque tenore et sub ea conditione concessa est fratribus Cistercii ipsa possessio ut neque ecclesiam neque cimiterium neque molendinum vel fullonem vel etiam furnum vel batandos ad corticem pulverizandum ibi construant neque piscationem aque habeant sed ipsam aquam si voluerint per domum vel circa eam divertant sine aliqua tamen elevatione alicujus cluse vel quolibet aque retinaculo Hoc etiam convenit inter utrasque ecclesias ut si quas deinceps possessiones in eadem villa divionensi vel in territorio ejus cisterciensis ecclesia quocumque modo adquisierit ad jus ecclesie sancti Benigni pertinentes nichil perdat ecclesia sancti Benigni de jure quod in eis prius habebat sed sicut reddebant prius qui eas tenuerant et censum et decimas et alias consuetudines ecclesia Cistercii exsolvat Ut autem hec omnia inviolabiliter imperpetuum observentur sigilli nostri impressione et sigillis predictorum episcoporum sed et probabilium personarum subscriptione presentem cartam signari fecimus et muniri S Gauterii episcopi lingonensis S Petri episcopi cabilonensis S Philippi abbatis sancti Benigni S Alexandri abbatis Cistercii S Willermi abbatis de Firmitate S Hervei abbatis u[n]gneiacensis S Garnerii S Gerardi lingonensis archidiaconorum S Walterii decani cabilonensis S Beraldi archipresbiteri de Sendrens S Hugonis remensis clerici nostri Actum Divione anno ab incarnatione Domini MCLXXI