Charter Document - 06310172

Omnibus ecclesie filiis Henricus Dei gratia eduensis episcopus salutem in Christo Vobis omnibus significandum duximus qualiter in causa que inter cistercienses et monachos de Vergiaco pro territorio de Destan extiterit processerimus ut cognita rei veritate cisterciensium justiciam intelligatis pro predicta siquidem causa a cisterciensibus curia nostra appellata ut eam fine debito terminaremus utriusque et cisterciensibus et predictis monachis diem disignavimus quem prior de Vergiaco nobis contra mandavit Iterato diem illis Edue constituimus cui tam prior quam cistercienses interfuerint sed quia negotiis nostris exigentibus ibi tam cito venire non potuimus prior recessit et nos expectare noluit licet ibi ad causam illam diffiniendam in eadem die satis tempestive venerimus Ne vero prior in aliquo post nos reclamare posset illum rursus ante presentiam nostram convocavimus et apud Sedelocum diem eis statuimus Cum autem statuta die cistercienses et prior apud Sedelocum venissent nec nos propter majora negotia ibi venire possemus mandavimus eis ut prope per sex leugas ab illo loco ad nos venissent Prior venire noluit Cistercienses abbas et plures alii venerunt et ad jus suum comprobandum testes idoneos secum adduxerunt quorum attestationes sicut audivimus vobis significare curavimus Robertus prior Cistercii dixit quod ipse interfuit quando Hugo prior de Vergiaco et qui cum eo erant monachi et servientes laudaverunt ecclesie Cistercii quicquid in territorio de Destan habebant pro XL sextariis annone censualibus annuatim reddendis Aimo monachus Cistercii dixit idem quod prior Guido sacerdos illud idem dixit Guerricus miles Vergiaci et Petrus prepositus Vergiaci illud idem attestaverunt De hac donatione retinuerunt monachi Vergiaci cursum propriorum porcorum causa pasture per nemora et quantum eis de lignis necessarium fuerit ad edificia sua facienda ita quod ex eis nec dare aliquid nec vendere possunt