Charter Document - 06310163
| Charter Number: | 06310163 |
|---|---|
| Cartulary Title: | Chartes et documents concernant l'abbaye de Cîteaux (1098-1182) |
| Charter Language: | Latin |
| Charter Origin: | Religious |
| Charter Type(s): | Judgement |
| Date: | 1162 |
| Date type: | Internal, A.D. |
| Resource Link(s): |
|
Charter:
Alanus Dei gratia autisiodorensis episcopus omnibus fidelibus ad quos littere iste pervenerint salutem Solent que bene terminata sunt aliquorum astucia in litteris revocari Proinde notum sit universis quod cum ecclesia cisterciensis a fratribus hospitalariis injuste se opprimi ad aures domni pape conquesta fuisset eo quod ipsi in territorio de Desten ad suum gravamen villam edificarent ego [et] dominus H[enricus] eduensis episcopus mandatum accepimus domini pape ut utraque parte audita eorum litem judicio terminaremus Cum itaque sepius ante nos convenissent et dominus eduensis adesse non potest nuntio et litteris suis mandavit ratum se habiturum quicquid inde a nobis judicio vel concordia fieret Hoc ipsum ipsi fratres et hospitalarii et cistercienses concesserunt Auditis itaque partibus cum ex judicio cisterciensibus probatio incumberet eorum testibus diligenter examinatis et ad voluntatem hospitalariorum digna probatione suscepta ipsi hospitalarii ad admonitionem nostram causam totam fratribus predictis liberam et quietam proclamaverunt et se ultra non intromissuros promiserunt Fratres vero cistercienses ad nostram similiter admonitionem concesserunt illis ut usque ad proximam omnium sanctorum festivitatem fructus et redditus in pace suscipiant ita ut de cetero ipsi hospitalarii nisi eorum bona voluntate se non intromittant Actum est anno ab incarnatione Domini MC sexagesimo secundo