Charter Document - 06310126
| Charter Number: | 06310126 |
|---|---|
| Cartulary Title: | Chartes et documents concernant l'abbaye de Cîteaux (1098-1182) |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1145 - 1146 |
| Date type: | Assigned |
| Resource Link(s): |
|
Charter:
Notum sit omnibus sancte Ecclesie filiis Bosonem de Crusillis una cum uxore sua sorore Girardi de Pulliaco laudantibus duabus filiabus suis donasse Deo et sancte Marie cisterciensi fratribusque ibidem Deo servientibus quicquid habebat in terra Lastricii videlicet dominatum ville nemora prata aquas et hoc per manum domni Amedei lausanensis episcopi Hujus doni testes sunt hi Willermus de Montefalconis maritus unius supradictarum filiarum Willermus rufus de eodem loco Turumbertus Americus de Nangim Aimo de Porgros Hugo de Genave Stephanus et Willermus monachi lausanensis episcopi Willermus de Vinzi monachus de Altacumba Hoc dono ita parato Boso de Crusillis et E[glantina] uxor ejus Girardo de Pulliaco sororio viri et uxoris fratri has litteras super dono miserunt Dilectissimo fratri suo Girardo de Pulliaco soror ejus E[glantina] uxor Bosonis de Crusillis et maritus ejus Boso sic transire per bona temporalia ut non amittat eterna Sciat dilectio vestra quod illo a quo est omne datum optimum et omne donum perfectum inspirante concessimus imperpetuum Deo et beate Marie cisterciensi fratribusque inibi Deo servientibus pro remedio animarum nostrarum patrum et matrum fratrum et sororum nostrarum quicquid jure habuimus in territorio lastriciacensi in hominibus in terris in aquis in nemoribus in pratis Ut vero et vos ipse in ista elemosina partem coram Deo et honorem ante homines habere possitis mandamus vestre dilectioni et valde precamur quatinus sancte cisterciensi ecclesie hoc donum sic sedere faciatis ut omni absque vexatione illud in perpetuum possideat et ut ipsi abbas scilicet ejusdem ecclesie et alii fratres gratias vobis inde agant et nos Ego Amedeus lausanensis episcopus omnia que hic continentur sigilli mei impressione confirmo