Charter Document - 06300057
| Charter Number: | 06300057 |
|---|---|
| Cartulary Title: | Recueil des actes du prieuré de Saint-Symphorien Autun de 696 à 1300 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1257 |
| Date type: | Internal, Calendar, Papal |
| Resource Link(s): |
|
Charter:
Alexander episcopus seruus seruorum dei Dilectis filiis Priori et Conuentui sancti Sinphoriani Eduensis ordinis sancti Augustini Salutem et apostolicam benedictionem Exigentibus uestre deuotionis meritis uotis uestris libenter annuimus et petitiones uestras quantum cum deo possumus fauorabiliter exaudimus Significastis siquidem nobis quod uos unanimiter ordinastis prestito nichilominus super hoc corporaliter iuramento et venerabili fratre nostro Eduensi Episcopo suum ad hoc postmodum prebente consensum ut si christi fideles uobis pro animarum suarum remedio aliqua erogauerint in ultima uoluntate tu fili Prior et successores tui de taliter erogatis medietatem et uos filii Conuentus medietatem reliquam de hiis [uero que] uobis ab eisdem fidelibus erogab[antur] pro anniuersariis celebrandis tu [Prior] et successores predicti tertiam et uos [Conuentus] duas partes percipere deberetis prout in litteris inde [factis] plenius uidetur contineri Nos igitur uestris supplicationibus inclinati ordinationem huiusmodi sicut [prouide] facta est et in alicuius preiudicium non [re]d[un]dat ratam et gratam habentes ipsam auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis infringere uel ei ausu temerario contraire Si quis autem hoc attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum Datum Laterani decimo sexto kalendas februarii Pontificatus nostri Anno Tercio