Charter Document - 06300010
| Charter Number: | 06300010 |
|---|---|
| Cartulary Title: | Recueil des actes du prieuré de Saint-Symphorien Autun de 696 à 1300 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 0968 - 0972 |
| Date type: | Assigned |
| Resource Link(s): |
|
Charter:
Ego in Dei nomine Ioannes papa sedis apostolice et Romane urbis apostolicus diuina clementia largiente notum uolo fieri omnibus qualiter ueniens quidam episcopus a partibus Galliarum nomine Girardus Augustudunensis ciuitatis presul egregius pro regis etiam amore et beati Petri principis apostolorum seruitio Romam expetiit nostram honorifice adgressus presentiam Qui dum nobis pro sua industria et honoris magnificentia gratus acceptabilis et charus existeret dum de pluribus sermo inter nos haberetur manifestauit mihi humillime reclamando de quibusdam hominibus qui terram de suo episcopatu presumptuose et uiolenter tenere uidentur insuper deprecatus est ut eos excommunicaremus et maledictionis iaculo illos damnaremus Cuius petitionem beneuole suscipiens iussi ego Ioannes papa seruus seruorum Dei talem excommunicationem et maledictionem fieri scriptam manu propria Benedicti archiepiscopi nostri Coniacet autem eadem terra in patria que dicitur Prouincia de abbatia sancti Symphoriani Quicumque ergo eam tenent terram sancti Symphoriani aut aliquid ex terra sancti Nazarii sine assensu Girardi eius ciuitatis episcopi ex authoritate Dei Patris omnipotentis et Filii et Spiritus Sancti omniumque sanctorum Dei potestate insuper beati Petri senioris nostri cum ceteris apostolis quibus data est potestas ligandi atque soluendi et ex ministerio nostro sint excommunicati et anathematizati atque a liminibus sancte Dei ecclesie alienati nisi conuersi ad satisfactionem uenerint Omnes enim maledictiones que in ueteri testamento et nouo scripte sunt ueniant super eos nisi ad emendationem uenerint Sint maledicti in ciuitatibus in uillis in agris in uiis in castellis in siluis et in omnibus locis Deleantur de libro uiuentium et cum iustis non scribantur nisi resipiscendi ad satisfactionem et emendationem uenerint Amen