Charter Document - 06300008
| Charter Number: | 06300008 |
|---|---|
| Cartulary Title: | Recueil des actes du prieuré de Saint-Symphorien Autun de 696 à 1300 |
| Charter Language: | Latin |
| Charter Origin: | Religious |
| Charter Type(s): | Exhortation |
| Date: | 0956 - 0958 |
| Date type: | Assigned |
| Resource Link(s): |
|
Charter:
Summorum summo primorum primo domno Manasse metropolitane sedis Arelatensi[s] archiepiscopo cum ceteris coepiscopis Landrico Auenionensi Odolberto [Ca]uall[ic]ensi et aliis Prouincie episcopis Emblardus Lugdunensium sedis archiepiscopus Rodmundus Eduensium episcopus Hermannus Senonensis ecclesie archiepiscopus Hildebodus Cabilonensium episcopus Maimbodus Matisconensium episcopus Acardus Lingonensium episcopus Ansegisus Trecassensium episcopus Wido Altissiodorensium episcopus Gautbertus Neuernensium episcopus cum ceteris episcopis Burgundie partibus commorantibus assiduas in Christo orationes Sciat uestra fraternitas quod cura nostri officii est causas sanctarum ecclesiarum inquirere et ad meliora queque prouocando reparare Nam domnus Rodmundus nuper a Roma ueniens detulit litteras ex parte domni Agapiti pape in primis admonitorias de terra sancti Symphoriani que coniacet in partibus Prouincie scilicet in comitatu Arelatensi et Auenionensi quam tenent Isuardus et socii eius sine uoluntate illorum qui corpus sancti Symphoriani custodiunt et uenerantur Vos enim estis in partibus illorum et uos intelligere potestis rationem sancti Symphoriani ut impleatur illud Apostoli frater fratrem adiiuuet et ambo consolentur Ergo petimus communiter ut omnes illos inuasores terre sancti Symphoriani semel bis et ter uocando ammoneatis ut resipiscant a talibus et permittant tenere sancti Symphoriani ecclesiam quod suum est et si tenere uoluerint impetrent ab eo qui loco sancti Symphoriani preest quoquomodo impetrare potuerint Sin autem nec reddere uoluerint nec impetrare sicut scriptum est et mandatum nobis a domno papa ex parte illius et ex parte nostra sint anathematisati et damnati et societate christianorum separati in ecclesiam Dei non intrent missam non audiant pacem cum christiano non faciant nec manducent nec bibant nec dormiant cum ullo christiano si infirmati fuerint non uisitentur et si mortui non sepeliantur sed in baratrum confusionis et perditionis cum Core Dathan et Abyron quos uiuos terra absorbuit demergantur