Charter Document - 06259074

A nostre Seigneur et a son conseil monstre William de Breouse que la ou il tient et doit tenir et ses anncestres devant lui ount tenu toute la terre de Gower entierment od toutes les frannchises frannches custumes et frannches usages a la dite terre appurtenanntz par le servise dun Chevaler pur touz services la vient Wauter de Pederton Conestable de Kermerdyn et fet somondre le dit William a son Chastel de Sweyneseye de venir a responndre as pleintes de ses gentz demeigne al Chastel de Kermerdyn la ou il unqes ne respondi ne respondre doit Et pur ceo que a cele somounce ne vynt grevousment le fit destreindre ensement les ministres le dit William fit somondre al Counto de Kermerdyn a respondre as avantdites pleyntes de la terre de Gower Et pur ceo quil ne vyndrent les fit mettre en exigende de Counte en Counte jusqes ad utlagarie Ceste chose fut monstre a nostre Seigneur le Roi en pleynant par le dit William mannde fut par le Roi au dit Conestable que de toutes maneres de tieles grevances touchantes le dit William surseit jusqes a cest Parlement unqes pur null mandement ne sursist tantque les gentz se rendirent a la prisone de Kermerdyn et illoqes de eux fist so volunte Per unt le dit William prie a nostre Seigneur le Roy et a son Conseil par la ou nul home ne doit avoir conisance de luy ne de sa gent de Gower forsque devant le corps le Roy mesmes si luy plest que selone le purporte de sa chartre que alowe luy est luy voille meintenyr et de tieles grevances dreit et remedie fair