Charter Document - 06243004

Adrianus episcopus servus servorum Dei dilectis filiis Ricardo abbati ecclesie de Fontibus ejusque fratribus tam presentibus quam futuris regularem vitam professis inperpetuum Officii nostri nos ammonet et invitat auctoritas pro ecclesiarum statu satagere et earum quieti ac tranquillitati auxiliante Domino salubriter providere Ea propter dilecti in Domino filii vestris justis postulationibus clementer annuimus et prefatam ecclesiam in qua divino mancipati estis obsequio sub beati Petri et nostra protectione suscipimus et presentis scripti privilegio communimus statuentes ut quascunque possessiones quecunque bona eadem ecclesia in presentiarum juste et canonice possidet aut in futurum concessione pontificum largitione regum vel principum oblatione fidelium seu aliis justis modis prestante Domino poterit adipisci firma vobis vestrisque successoribus et illibata permaneant In quibus hec propriis duximus exprimenda vocabulis Ecclesiam de Fontibus et grangiam de Morcher cum tota terra de Herleshow per suas divisas plenarium ex dono Roberti Sarez et uxoris illius Raganildis et terram de dono Willielmi de Percy et terram quam dedit Ricardus Pedelarrun et Normannus filius Uctredi et terram quam Aldelinus de Aldefelde dedit vobis et terram que erat in calumpnia inter Herleshow et Bertrannum de Bulmer quam ipse quietam clamavit Grangiam de Sutton cum terris ex dono Rogeri de Molbray et uxoris ejus Aaliz et Radulphi de Bellun cum terris acquisitis a Torphino filio Gosipatric et a Godwyno de Clutherum et filio ejus Dolfin Grangiam de Caiton cum terra Herberti et via ex concessu Ricardi Pedelarrun et terram que erat in calumpnia inter Caitonam et Merchingtonam Grangiam de Kylnesey cum terra quam Copsi de Redmer quietam clamavit Grangiam de Cowton More cum appendiciis suis Grangiam de Daker cum necessariis plenaria in Foresta de Niderdale ex dono Rogeri de Molbray Grangiam de Aldeburgh cum terra quam dedit Turgisius filius Malgeri Sex acras terre de dono Gichel in Balderby et tres de Radulpho de Brisow cum ceteris terris silvis pascuis pratis et aliis appendiciis ad supradictas grangias pertinentibus Libertates etiam omnes seu immunitates ac regias consuetudines a karissimo filio nostro Henrico Anglorum rege rationabiliter vobis et ecclesie vestre indultas et scripti sui pagina roboratas auctoritate apostolica confirmamus et illibatas perpetuis temporibus statuimus permanere Sane laborum novalium vestrorum quos propriis manibus aut sumptibus colitis sive de nutrimentis animalium vestrorum nullus omnino clericus sive laicus a vobis decimas exigere presumat Adjicientes preterea constituimus ut si super decimis inter vos et aliquam personam ecclesiasticam cum consensu archidiaconi vel episcopi sui compositio rationabiliter facta est rata perpetuis temporibus et inconcussa persistat Si qua vero libera et absoluta persona pro redemptione anime sue vestro monasterio se conferre voluerit suscipiendi eam liberam facultatem habeatis Addentes etiam auctoritate apostolica interdicimus ne quis fratres vestros clericos sive laicos post factam in monasterio vestro professionem absque vestra licentia suscipere audeat vel retinere Presenti quoque decreto sanximus ut episcopus in cujus episcopatu ecclesia vestra consistit nec regularem electionem abbatis vestri unquam impediat nec de removendo ac deponendo eo qui pro tempore fuerit contra statuta Cisterciensis Ordinis et auctoritatem privilegiorum suorum se ullatenus intromittat Sanximus autem ne quis archiepiscopus vel episcopus sive cujuslibet ordinis locum vestrum a divinis interdicat officiis sed liceat vobis omni tempore clausis januis et exclusis excommunicatis et interdictis divina officia celebrare nisi abbatis vel fratrum ipsius loci evidens et manifesta culpa extiterit Paci quoque et tranquillitati vestra paterna sollicitudine providentes auctoritate apostolica prohibemus ut infra clausuras locorum sive grangiarum vestrarum nullus violentiam vel rapinam sive furtum facere vel hominem capere audeat Et si quis super hoc temerario ausu presumpserit tanquam sacrilegus judicetur et excommunicationis ultione plectatur Decernimus ergo ut nulli omnino hominum liceat prefatam ecclesiam temere perturbare aut ejus possessiones auferre vel ablatas retinere minuere seu quibuslibet vexationibus fatigare sed illibata omnia et integra conserventur eorum pro quorum gubernatione et sustentatione concessa sunt usibus omnimodis pro futura Salva sedis apostolice auctoritate et dioecesani episcopi canonica reverentia Si qua igitur in futurum ecclesiastica secularisve persona hanc nostre constitutionis paginam sciens contra eam temere venire temptaverit secundo tertiove commonita nisi presumptionem suam congrua satisfactione correxerit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore ac sanguine Dei et Domini Redemptoris nostri Jesu Christi aliena fiat atque in extremo examine districte ultioni subjaceat Cunctis autem eidem loco sua jura servantibus sit pax Domini nostri Jesu Christi quatenus et hic fructum bone actionis percipiant et apud districtum Judicem premia eterne pacis inveniant Amen Amen Amen Ego Adrianus catholica Ecclesia episcopus [subscripsi] Ego Imarus Tusculanus episcopus Ego Cencius Portuensis et sancte Rufine episcopus Ego Gregorius Sabina episcopus Ego Guido presbyter cardinalis tituli Sancti Grisogoni Ego Hubaldus presbyter cardinalis tituli sancte Praxedis Ego Manfredus presbyter cardinalis tituli Sancte Sabine Ego Bernardus presbyter cardinalis tituli Sancti Clementis Ego Johannes presbyter cardinalis Sanctorum Johannis et Pauli tituli Pamachii Ego Henricus presbyter cardinalis tituli Sanctorum Nerei et Achillei Ego Johannes presbyter cardinalis tituli Sanctorum Silvestri et Martini Ego Odo diaconus cardinalis Sancti Gregorii ad velum aureum Ego Guido diaconus cardinalis Sancte Marie in porticu Ego Jacinctus diaconus cardinalis Sancte Marie in Cosmidin Ego Johannes diaconus cardinalis Sanctorum Sergii et Bachi Data Laterani per manum Rolandi sancte Romane ecclesie presbyter cardinalis et cancellarii viiii Kalendas Decembris Indictione v Incarnationis vero Dominica anno MCLVI pontificatus vero domni Adriani pape iiii anno secundo