Charter Document - 06232025

A touz iceaus qi cest present lettre verront ou orrount Florence Count de Hoillaund [] superius nominati saluz Come nous eoms otrie et graunte de nostre bone voluntee et commune assent saunz nulle destresce a noble Prince Sir Edward par la grace de Dieu Roi d'Engleterre qil come soverein seignor de la terre d'Escoce puisse oier trier et terminer noz chalengez et noz demaundez qe nous entendoms moustrer et averrer por nostre droit en roialme d'Escoce et droit resceyvre devaunt lui Come Soveraine seigneur de la terre promettantz ia le menis qe son fete averoms ferine et estable et qe celui en portera le roialme a qi droit le durra devaunt lui Mes por ceo qe l'avauntdit Roi d'Engleterre ne poet tien maner de conisaunce fair ne acompler saunz juggement ne juggement doit estre saunz execucion ne execucion ne poit il fair deument saunz la possession et seisine de mesme la terre et des chasteaux Nous voloms otrioms et grauntoms qil come soverein seigneur a parfair lez chosez avauntditz eit la seisine de toute la terre et des chasteaux d'Escoce tant qe droit soit fait et parfoume as demaundantz en tien manere qe avaunt ceo qil eit la seisine avauntdite face bone seurte et suffisaunte as demaundantz et as Gardeins et a la commune de roialme d'Escoce a fair le reversion de mesme le roialme et des Chasteaux ove toute la realte dignite seigneurie fraunchisez customez droitoures leys usages et possessions et touz maners d'appurtenauntz en mesme l'estate qils estoient quant la seisine lui fuit baillie et liveree a celui qi le dreit on portera par juggement de la realte Sauve a Roi d'Engleterre le homage de celui qi serra Roi Issint qe la reversion soit fait de deniez le deus moys apres le jour qe le dreit serra trie et afferme Et qe lez eisseux de mesme la terre en la meisne temps rescevs soient sauvement mys en depose et bien gardez par la main le chaumberlein d'Escoce qi hore est et de celui qi serra assigne depart le Roi d'Engleterre et desouz lour seals sauve resonable sustenaunce de la terre et dez chasteaux et de ministrez de Roialme En testmoigne do cestez chosez [] Fait et done [] l'an []