Charter Document - 06231025

A toutz ceaux qui ceste lettre verront ou orront Florence Count de Hoillaund Robert de Brus seigneur de Val d'Anaunt Johan Baillol seigneur de Galveye Johan de Hastings seigneur de Bergeveny Johan Comyn seigneur de Badenough Patrik de Donebar Count de la March Johan de Vescy por son pier Nichol de Soulez et Willaum de Roos saluz en Dieu Come nous entendoms avoir droit en Roialme d'Escoce et cele droit moustrer chalenger et averrer devaunt celui qui plus poair jurisdiccion et reison eust de trier nostre droit et le noble Prince Sir Edward par la grace de Dieu Roi d'Engleterre nous ad informez par bonez et suffisauntz reisons que apent et avoir doit la Sovereigne seigneurie du dit Roialme d'Escoce et la conisaunce d'oier trier et terminer nostre droit Nous de nostre propre voluntee saunz nulle manere de force ou distresce voilloms otrioms et grauntoms de resceyvre droit devaunt lui Come Sovereigne seigneur de la terre Et voloms ia le menis et promettoms que nous averoms et tendroms ferme et estable son fait Et qe celui emportera le Roialme a qi droit le durra devaunt lui En testmoigne de ceste chose nous avoms mys noz seals a cest escript Fait et done a Norham le Mardy prochain apres la Ascension l'an du grace MCC nonaunte primere