Charter Document - 06230034
| Charter Number: | 06230034 |
|---|---|
| Cartulary Title: | Memorials of the Abbey of St. Mary of Fountains |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1311 |
| Date type: | Internal, A.D., Calendar |
| Resource Link(s): |
Borthwick Institute - Register 8 (f290r) |
Charter:
Robertus de Pykering canonicus Ebor venerabilis patris domini Willelmi Dei gratia Ebor archiepiscopi Anglie Primatis in remotis agentis vicarius generalis fratri Thome de Staunford Templario salutem in Auctore salutis Cum nuper in concilio provinciali Ebor vocatis ad id tam exemptis quam non exemptis juxta sedis apostolice mandatum tam super statu Templariorum quam super aliis transmittendis ad generale concilium celebrato de unanimi consensu predicti concilii extiterat ordinatum quod singule Templariorum persone ad diversa religiosorum loca tam exemptorum quam non exemptorum juxta discrecionem nostram mitterentur sub fida custodia inibi morature prout in literis discreti viri magistri Johannis de Nassington officialis curia Ebor cui vices nostras commisimus in hac parte diversis domibus religiosis Eboracensis dyoecesis destinatis plenius continetur qui te fratrem Thomam predictum juxta ordinacionem nostram et totius concilii assensum ad monasterium de Fontibus cum dictis suis transmisit ibidem sub certis penis et censuris et secundum formam et tenorem literarum earumdem humiliter et benigne moraturum ac tu proprie salutis tue immemor ut intelleximus abbatem et conventum predicti monasterii de Fontibus eorumque ministros verbis probrosis et contumeliosis scandalisque plurimis improperas et improperando afficis in Dei offensam sedis apostolice contemptum predicti concilii vituperium ordinacionisque sue subversionem quantum in te est et anima tua periculum manifestum et scandalum plurimorum Attendentes itaque tam canonica quam civili sanccione cautum existere ut quos Dei timor a malo non revocat saltem coherceat severitas discipline et postea nolentes gesta tua premissa oculis convenientibus pertransire te auctoritate nobis in hac parte attributa monemus primo secundo et tercio et peremptorie cum facti qualitas id persuadeat moderandum ut de cetero modeste et moderate erga predictos abbatem et conventum et singulos de conventu eorumque ministros absque improperiis verbis probrosis seu contumeliis te geras habeas et teneas victum communem ipsorum pro sustentacione persone tue ab eis tibi ministratum suscipiens et ab injuriis et conviciis atque verbis probrosis omnimodo abstinens specta monasterii non exiens donec de persona tua aliter fuerit ordinatum sub pena excommunicacionis majoris quam te incurrere volumus ipso facto si contra veneris in aliquo premissorum Data apud Eboracum v kalendas [Septembri] anno gratie MCCC duodecimo