Charter Document - 06230020

Venerabili in Christo patri domino [] Dei gratia abbati de Clarevalle Cisterciensis ordinis J permissione Ejusdem Ebor [Archiepiscopus] salutem et gratiam Salvatoris Cum domus de Fontibus ordinis supradicti filia domus vestre que in Regno Anglie nobilior ut credimus non habetur que a sui fundatione primaria dotata extitit et ditata per quorumdam confederationes et colligaciones ut dicitur illicitas quorum aliqui eidem domui dicuntur hactenus prefuisse adeo quod dolentes referimus in temporalibus sit collapsa quod absque summa industria de reformacione ejusdem quasi penitus desperatur Nos qui racione fundacionis et patronatus quos in dicta domo de Fontibus habere dinoscimur calamitati ejusdem zelo sinceriori afficimur et depressioni ejusdem intime condolemus et reformacionem ipsius efficaciter cupimus provenire vos omni qua possumus affectione requirimus et rogamus quatenus de statu ejusdem domus miserabili et confederationibus supradictis faciatis per vestros investigari diligencius et inquiri ipsosque quos culpabiles reperiri contigerit in premissis donec ipsa domus fuerit ab onero quo premitur relevata alibi in ordine moram facere compellatis ne contagione ipsorum contingat quod absit alios maculari et ut ipsis a futuri electione abbatis exclusis ad honorem Dei et ecclesia provideri valeat de persona ydonea cujus cooperante industria quod admodum affectamus status ejusdem lamentabilis meritorie in melius reformetur quod per alicujus de domo industriam speramus Deo propicio eventurum exclusis hiis qui utilitati ejusdem impedimentum hactenus prestiterunt et bona ipsius dampnabiliter consumpserunt Dat apud Thorpe xiii kal Decembris anno gracie MCC nonagesimo