Charter Document - 06230015

Divine dispensatio pietatis que nunc terribilium suorum virtutes ostendens quasi quibusdam minis et increpationibus ad penitentiam conterit peccatores nunc autem sue suavitatis abundantiam exhibens tamquam blanditiis et promissis quoslibet ad Christi allicit caritatem totis est affectibus a cunctis fidelibus veneranda Nuper namque in pluribus locis Dominus terram tangens et faciens eam tremere multos conteruit ad salutem et in diversis partibus nova miracula suscitans multis salutis gaudia celitus irroravit Ut enim fidem ecclesie sue roboret et confortet spem erigat et exaltet caritatem continuet et accendat ut confutet pravitatem hereticam perfidos ad viam advocet veritatis et ad penitentiam revocet peccatores mirificat sanctos suos qui legitime certantes in hac ecclesia militanti ad celestem patriam pervenerunt ubi animabus glorificatis feliciter stolam primam adepti confidentes in illum intelligunt veritatem et fideles in dilectione acquiescunt eidem secundam stolam felicius adepturi quin scilicet incinerata nunc corpora glorificanda resurgent fulgida agilia subtilia et impassibilia perpetuo cum Domino regnatura In cujus rei evidentissimum et infallibile argumentum gloriosus Dominus quorum animas jam glorificavit in celo nonnumquam corpora in terra clarificat faciens ea quasi participantia divine glorie divinis miraculis corruscare quibus ad venerationem eis debitam exhibendam eorumque imploranda suffragia merito invitemur Unde gaudemus in Domino et in ejus laudibus delectamur quod sicut venerabilis frater noster Archiepiscopus et dilecti filii Decanus et Capitulum Eboracen necnon quamplures ecclesiarum Prelati de partibus illis suis nobis litteris pluries intimarunt felicis recordationis Willelmus quondam Eboracensis Archiepiscopus tanta vivens fulsit gratia meritorum quod post felicem ejus obitum ad ostendendam ipsius gloriam sanctitatis Dominus ad sepulchrum ejus multa et magna miracula operatur Verum licet oportune importune nobis totis affectibus supplicarint ut cum lucerna non sit ponenda sub modio set supra candelabrum statuenda cum quem Dominus honorat in ecclesia triumphanti nos in militanti ecclesia sanctorum cathalogo ascribere deberemus Nos tamen provide attendentes quod in tam sancto negotio non est nisi cum maturitate plurima procedendum ad majorem evidentiam veritatis discretioni vestre de qua plenam in Domino fiduciam obtinemus per apostolica scripta mandamus quatinus habentes pre oculis solum Deum qui non indiget mendaciis alicujus tam de vita quam de miraculis Sancti predicti perquirentes sollicitam veritatem que inveneritis per vestras nobis litteras intimetis ut ex vestra relatione sufficienter instructi procedamus exinde prout secundum Deum viderimus procedendum Quod si non omnes [] Datum Laterani Non Aprilis Pontificatus nostri Anno Septimo