Charter Document - 06200242

Sachent tous presens et avenir que je Johan Goscelin du Mesnil Soret de l'ascentement et de le volente de Maheut ma fame ai vendu a hommes religieus l'abbe et le convent du Tresport quatre sous de rente par an pour quarante sous de tournois paies a moi des devant dis hommes religieus devant les mains les quieus quarante sous Robert Gomont donna pour le salu de s'ame a acater le devant dite rente ad anniversaires du devant dit lieu seur deus pieches de me terre assises u terouoir du Mesnil Soret des quele deus pieches de terre l'une est assise jouste le terre Ricart Lengleis d'un coste et de l'autre jouste le terre Guillaumele Serjant clerc et aboute a le terre Adan le Petit l'autre pieche est assise jouste le terre Raoul Tardieu d'un coste et de l'autre jouste le terre a l'ausmosnier et aboute a le terre Mahieu Tournelievre Et je devant dit Johan Gosselin et mes hoirs sommes tenus a rendre et a paier chascun an ad devant dis religieus et a leurs successeurs les devant dis quatre sous d'annuel rente a Pasques Et se eissi estoit que les devant dis religieus ou leurs successeurs n'estoient paies des devant dis quatre sous de rente bien et en pais au terme desus dit je devant dit Johan Goscelin veul et otroi pour moy et pour mes hoirs que les devant dis religieus ou leur que mandement puissent faire leur plaine justiche seur les devant dites pieches de terre et seur le remanant de tout mon fie ensement tant pour le rente ne mie paie au terme desus dit comme pour l'amende Et je devant dit Johan Goscelin et mes hoirs ad devant dis hommes religieus et a leurs successeurs les devant dis quatre sous d'annuel rente contre tous en perpetuite seur tous nos biens moebles et immoebles sauve le droiture seignourie sommes tenus garantir et chascun an au terme desus dit a paier Et je devant dite Maheut fame du devant dit Johan Gosselin de me bone volente sans nul contraignement et de le volente du dit Johan mon mari ai jure sus les saintes euvangiles a tenir les choses desus dites fermement sans aler encontre par reson de douaire ou d'autre chose quele que ele soit ou puist estre Et que che soit ferme chose et estable u tans avenir nous desus nonmes Johan et Maheut avons cheste presente chartre seelee ensemble de nos seaus Che fu fait en l'an de grace mil deus chens quatre vins et dis et sept u mois de mars le mardi en le feste de l'Annuntiation Nostre Seignieur Tesmoins cheus Nichole Beauves mestre Johan le Carpentier de Mesnilval Pierres de Listevile et plusors autres