Charter Document - 06200240

Sachent tous cheus qui sunt et qui avenir sunt que je Robert Poitevin et Aalis Canvel fame du dit Robert par nostre quemun assent avons vendu ensemble a Robert le Cat bourgois de Blangi une pieche de terre assise en le paroisse de Blangi jouste le terre Honnere du Four d'un coste et le terre au dit Robert le Cat d'autre et aboute d'un bout a le terre Hais Canvel et de l'autre bout a le terre Katerine Aloul pour lequele terre vendue le dit Robert nous a ballie soissante sous de tournois et nous en tenons bien apaies a tenir et a pourseir en parduraulete au dit Robert et a ses hoirs le dite terre vendue bien et en pais des ore mais sans nul contredit ni empeechement de nous ne de nos hoirs en rendantde che chascun an en parduraulete a le feste saint Remi a Nichole Savari trois tournois de rente du dit Robert le Cat ou de ses hoirs Et nous devans nommes Robert et Aalis et nos hoirs au dit Robert le Cat et a ses hoirs le devant nommee pieche de terre vendue contre tous sommes tenus a warandir et tous empeechemens a delivrer sauves les droitures as segneurs kevetaig nes par l'abandon de tous nos biens meubles et non meubles quel part que il porront estre trouves Et pour che que che soit ferme et estaule en tous tans nous avons seele cheste charte de nos propres seaus Che fu fait en l'an de grace mil CC quatre vins et quinze le venredi apres le Trinite Tesmoins hicheus Berthemieu Pouchet Willaume Morisse Nichole Bretuel clerc et asses autres