Charter Document - 06200239

A tous cheus qui ches leitres verront ou orront le viconte du Nuef Castel salut Sachies que par devant nous furent presens Jehan Cardon Raoul Aleaume de Guillemercort requenurent de leur volentez que il ont vendu a hommes religieus l'abbe et le convent du Tresport por sessonte et dis sept sous sis deniers tornois dont il se tindrent bien apaies sept sous nuef denierz de annuel rente le dit Jehan Cardon chine sous dis denierz por chinquante et wyt sous quatre denierz et le dit Raoul Aleaume vint et trois denierz de rente por dis et nuef sous deus denierz tornois lequele rente devant dite Jehan le Roy rendoit chasqun an as devant dis Jehan et Raoul t d'une pieche de terre assise en Boieval de le quele pieche de terre lez devant dis Jehan et Raoul rendoient trois denierz as dis religieus et siet jouste le terre Climent Cardon d'une part et de l'autre jouste le terre Guillaume Gueraume et aboute d'un bout a le terre mesire Robert le Senescal de Eu a avoir et a rechevoir lez wyt sous de rente devant dis chasqun an as dis religieus a le Nat[ivite] Nostre Se gneur du dit Jehan le Roy et de sez hoirs ou de cheus qui le dite terre tendront quitement et en pais sans che que les devant dis Jehan Cardon et Raoul Aleaume ne leur hoirs i puissent riens demander ne nul debat meitre de lequele rente devant dite le dit Jehan Cardon pramist garandir por li et por ses hoirs as dis religieus chine souz dis deniers et le dit Raoul Aleaume pramist garandir por li et por sez hoirs vint et trois deniers as dis religieus a tous jours lequele renle dessus dite vendue les devant dis Jehan et Raoul si comme il est devise as dis religieus contre tous pramistrent garandir ch'est assavoir le dit Jehan chine sous dis deniers et le dit Raoul vint et trois derniers tornois ainsi que se il ne le garandissoient il obligent por eus et por leur hoirs leur cors a tenir en prison et tous leur biens muebles et immuebles a vendre et a despendre par nostre main et que la vente de leur biens qui seroit faite par nostre quemandement valle autant comme se il le fesoient et rendre tous cous et tous damages qui seront fais en deffaut de la garandie et en seroit creu chil qui ches leitres aportera par son serement sans autre prove E nous u tesmoing de che avons [ches leit]res seelees du seel de la viconte deu Nuef Castel a le requeste des parties sauf le droit le [Roi et] l'autri avec les seaus des devant dis Jehan et Raoul lesques il ont requeneus Che fu fait en l'an de grace mil CCIIII et quatorse le lundi apres le feste saint Mathias l'apostre