Charter Document - 06200237

A tous cheus qui ches lettres verront ou orront Raimmont Passemer ballif de Eu salut Conme contens fust meu entre honmes religieus l'abbe e le convent du Troiport d'une part e Wyllaume de Cantepie escuier d'autre sus che que le dit Wyllaume avoit fet justise e pris nans en un fie que les dis religieus ont en une ville que l'en apele Mellemarel e les dis religieus eussent mis gage e plege que le dit Wyllaume avoit fet justise ou il ne pooit ne ne de voit e pour che que les dis religieus ne voleient mie contenchier ne plesdier au dit Wyllaume par concel de bone gent il s'acorderent e le dit Wyllaume autresi que monsegneur Henri de Grantcort e mesire Wyllaume de Pierrepont chevaliers seussent e enquersissent combien les aides costumieres e les corvees de chu fie porroient valoir a pris d'argent e che que il diroient que il devroient valoir le dit abbe e conventrendroient au dit Wyllaume a achaterrente en son fie ou la il vodroit ou a fere sa volente de l'argent ja soi che que il ne conoissoient que le dit Wyllaume eust en chu fie ne justise ne segnourie e comme contens fust entre eus en la cort de anorable homme e discrest l'official de Roam meu par la raison de chele justise les desus nommes abbe e convent e le dit Wyllaume se mistrent du tout es deus chevaliers desus nommes mesire Henri de Grantcort e mesire Wyllaume de Pierrepont desus nommes a fere leur volente e se obligerent a tenir fermement sans aler de riens encontre tout che que les deus chevaliers desus dis diroient ou ordeneroient des contens e des debas desus dis en tele maniere que se il n'estoient a acort que mesire Robert de Saint Pierre chevalier eleu e nomme des parties desus dites seroit le tiers e a che ou il s'acorderoit ovec un des autres seroit tenu fermement sans che que nule des parties en peust aler de riens encontre nous faisons assavoir que les parties presentes par devant nous que le dit monsegneur Henri e le dit monsegneur Robert qui apele estoit le tiers miseeur pour le debat qui estoit entre le dit monsegneur Wyllaume e monsegneur Henri rendirent leur dit en le maniere que il en sieut ch'est assavoir que le dit abbe e convent rendroient au dit Wyllaume vint e une livre sept souz e sis deniers tornois pour toutes choses e que des ore en avant le dit Wyllaume ne ses hoirs n'aroient justise ne segnourie sus le devant dit fie pour nule chose quele que ele fust e des despens fes en la cort de l'official que nul ne seroit tenu a rendre riens a l'autre e qui plus aroit mis si s'en soffrist E ch'est acort fu aporte par devant monsegneur le conte e devant son conceil u jour du samedi en le vegille saint Andrieu l'apostre qui fu en l'an de grace mil CC e III e douze e par le conceil que monsegneurle conte en eut il quemanda que nous feis r sons as devant dis abbe e convent lettres seron ch'est acort E u tesmoing de che e en ensivant le quemandement monsegneur le conte avons ballie au dit abbe et convent ches lettres seellees du seel de le ballie du conte de Eu Fetes en l'an e u jour desus dis