Charter Document - 06200235

Sachent tous chaus qui sunt et qui a venir sunt que je Renaut du Buisson du Mesnil Alart ai vendu et otroie et du tout en tout deguerpi a Willaume Francheis de Real Camp une masure que je avoie au Mesnit Alart ove le garding et l'edifiement assise entre la masure Johan Auberi d'un coste et la masure Gosse de Hoilandre de l'autre et aboute d'un bout a la rue et de l'autre a la terre a l'abe dou Treisport et une pieche de terre et terroer de la dite assise entre la terre du dit a[bbe] de deus costes et aboute d'un bout a la terre Guifroi le Vavasor et de l'autre au quemin qui main e a Foucart Mont por sis libres de torneis dont je me tieng por paie devant les mains bien et loialment a tenir et a porseoir la dite masure et la dite terre au devant dit Willaume et a ses hoirs heritelment franquement quitement et empes des seignors de qui je les tenoie par les redevanches qui en sont deues a paier as termes que eles sont deues sans empeechementde moi ou de mes hoirs et doins congie au dit Willaume et a se hoirs de fere des hore mes en avant de la masure et de la terre du tout leur volente sauve la droiture as seignors chevetegnes Adechertes je devant dit Renaut et mes hoirs summes tenus cheste devant dite vente et otroianche warantir delivrer et despeechier au devant dit Willaume et a ses hoirs contre tous qui a droit et a loi vorront estre par l'abandon de tous nos biens muebles et non mueble presens et a venir Et que che soit ferme chose et estable a tous jors je li ai ballie chestre letre seelee de mon propre seel Che fu fet en l'an de grace mil et deus chens quatre vins et onse et moi de fevrier l'endemain de feste saint Mathia apostre Tesmoins ches Robert de Cans Andreu le Corder clerc Johan Portebos Ricart le Clerc Hue de Hoilandre et mous autres clers et les