Charter Document - 06200231

A tous cels qui ces lettres verront ou orront Johan conte de Eu salut Comme hommes religieus l'abbe et le convent de Saint Michiel du Tresport deissentque il devoient avoir leur pors franz de pasnage en nostre forest de Eu par chartre qu'il ont de noz anceseurs en la quele chartre est contenu que il doivent avoir pasture franche en la dite forest a toutes [leur] bestes et nous deissiensque par ce mot pasture [il] ne devoient mie avoir pasnage a leur pors en la dite forest nous fesons a savoir que il est acorde entre nous et les ditz [religieus] que els et leur successeurs puissent franchir wit vinz pors de pasnage en la dite forest aveques la dite pasture chascun [an] pour la dite abbaye pour leur manoirs [et] pour les fremiers mananz en leur manoirs de quelque part que les pors leur viengnent a fere leur volente ainsi que nous [ne noz hoirs] ne puissions es devant diz wit vinz pors pasnage demander Et voulons [et] otroions [que les] devant ditz religieus et [leur successeurs tien]gnent et poursiechent touz [les achas] que il ont fetz en nostre contee de Eu et touz les dons que on leur i a donnez si que au jour que ceste lettre fu fete Et voulons [et otroions] que les ditz religieus et leur successeurs aient et poursiechent franquement [et quictement la moute que noz] ancheseurs [prenoient et] povoient prendre jadis ou fie Aleaume de Ostremencorta Grantcourt laquele moute fu donnee de noz anceseurs par chartre que il en ont Et voulons et otroions que les ditz religieus et leur successeurs aient et poursiechent la moute des hommes de [Mesnival de Mesnil Soret du Quesney] de Hyonville de Flosques de Estalonde [et] du Mesnil Estellent laquele moute il ont du don de nos anceseurs par chartre aveques leur moulin de Crieul ainsi que nous ne noz hoirs ne pourrons les hommes des devant dites villes contraindre de venir a noz moulinz [moudre ne les ditz religieus ne leur] successeurs contraindrede venir moudre a leur moulinz ainz iront les ditz hommes moudre la ou il voudront en la maniere que [il] l'ont acoustume Et voulons et otroions que touz les dons et les confermemens que il ont de noz anceseurs leur soient bien tenuz et gardez a tous [jours et que les ditz] religieus et leur successeurs [tien]gnent et poursiechent le dit pasnage la dite pasture et touz les ditz achas les dons et les dites moutes bien franchement et paisiblement en franche et pure et perpetuel aumosne a touz jours Et pour ce que ce soit ferme chose et estable a touz [jours nous leur avons] donne ces lettres seelees de nostre seel Faites en l'an de grace mil deus cenz quatre vinz et deuz le lundi emprez la sainte Luce